मालवण : पुढारी वृत्तसेवा
मालवण-कालावल खाडीपात्रात व किनाऱ्यालगत महसूल विभाग आणि बंदर विभाग पथकाने केलेल्या संयुक्त पाहणीदरम्यान कालावल खाडीतील बंडा बेटानजीक वाळूने भरलेल्या तीन होड्या व शेरे जमिनीतील वाळू साठा जप्त करण्यात आला.
तसेच, रेवंडी स्मशानभूमी, गावकरवाडी, वायांगणी-सडयेवाडी, तेरई, भगवंतगड, तोंडवळी - करंजेवाडी, तोंडवळी-मधलीवाडी येथील वाळू किनाऱ्यावर उतरविण्यासाठी बांधलेले दगडी व लोखंडी रॅम्प तोडण्याच्या सूचना महसूल प्रशासनाने दिल्या.
कालावल खाडीपात्रातील अनधिकृत वाळू उपशाच्या पार्श्वभूमीवर मालवण महसूल विभाग व बंदर विभाग यांच्यामार्फत कालावल खाडीत मंगळवारी संयुक्त पाहणी करण्यात आली. या पाहणीमध्ये रेवंडी जेटी परिसर व त्या समोरील भागात अनधिकृत वाळू उत्खनन होत असल्याचे दिसून आले नाही.
या पथकाला बंडा बेटानजीक वाळूने भरलेल्या तीन होड्या किनाऱ्यावर आढळून आल्या. या होड्यांमध्ये अनुक्रमे ६ ब्रास, २ ब्रास व ५ ब्रास एवढी वाळू होती. तसेच, शेरे जमिनीमध्ये ४ ब्रास वाळू साठा आढळून आला. ही वाळू व होड्या मालवण बंदर निरीक्षक यांनी जप्त करत त्या तोंडवळी पोलिस पाटीलांच्या ताब्यात दिल्या.
एकूण ४७ रॅम्प तोडण्याचे आदेश
तसेच पाहणी दरम्यान आढळलेले रेवंडी स्मशानभूमी, गावकरवाडी येथे २ लोखंडी रॅम्प, वायंगणी-सडयेवाडी येथील ४ दगडी व ४ लोखंडी रॅम्प, तेरई येथील ७ दगडी रॅम्प, भगवंतगड येथील ७ दगडी व ४ लोखंडी रॅम्प, तोंडवळी-करंजेवाडी येथील ४ दगडी रॅम्प, तोंडवळी-मधलीवाडी येथील १५ दगडी रॅम्प दिसून आले. हे सर्व रॅम्प तोडण्याच्या सूचना प्रशासनाकडून संबंधित अधिकाऱ्यांना देण्यात आल्या
