कुडाळ : वेंगुर्ले तालुक्यातील मठ-कुडाळ मार्गावर विद्युत कंपनीच्या ठेकेदाराने परवानगी न घेता भूमिगत विद्युत वाहिनीसाठी जेसीबीच्या सहायाने या मार्गांवरील साईडपट्टीवर खोदाई केली. साईडपट्टी बुजवण्याच्या सूचना देऊनही ती तशीच ठेवल्याने यात सार्वजनिक बांधकाम विभागाचे सुमारे 30 लाखाचे नुकसान झाले आहे. याप्रकरणी कुडाळ सा. बां. विभागाचे कनिष्ठ अभियंता यांनी कुडाळ पोलिसात दिलेल्या तकारीनुसार ठेकेदार भीमराव घाटोळे यांच्या विरोधात गुन्हा दाखल करण्यात आला आहे.
ही घटना 31 मे 2025 ते 3 जुलै 2025 या कालावधीत घडली आहे. यामध्ये कुडाळ सार्व. बांधकाम विभागाचे कनिष्ठ अभियंता ईश्वर रामचंद्र बामणे यांनी कुडाळ पोलिसात दिलेल्या फिर्यादीनुसार, वेंगुर्ले तालुक्यातील मठ-कुडाळ-गारगोटी हा राज्य मार्ग देखभाल दुरुस्तीसाठी सा. बां. उपविभाग क्रमांक 1 कुडाळ यांच्याकडे आहे.
या मार्गावर कुडाळ तालुक्यातील वाडीवरवडे येथे महावितरण कंपनीचे ठेकेदार भीमराव घाटोळे यांनी 31 मे ते 3 जुलै 2025 या कालावधीत या सार्वजनिक बांधकाम विभागाची कोणत्याही प्रकारची मंजुरी न घेता रस्त्याच्या साईड पट्टीवर जेसीबीच्या सहाय्याने खुदाई केल्याचे निदर्शनास आले आहे.
ठेकेदार भीमराव घाटोळे यांना ही साईडपट्टी बुजवण्याचा सार्वजनिक बांधकाम विभागाच्या वतीने सूचना देण्यात आल्या होत्या. मात्र अद्यापपर्यंत ही साईडपट्टी बुजवण्यात आली नसून यामुळे शासनाच्या मालमत्तेचे अंदाजे 30 लाख रुपयांचे नुकसान झाले आहेे. या प्रकरणी जेसीबीसह अन्य मशिनरी ताब्यात घेण्यात आली आहे. अधिक तपास हेड कॉन्स्टेबल ममता जाधव करत आहेत.
