मंडणगड : मंडणगड येथील दिवाणी व फौजदारी न्यायालयाच्या नूतन इमारतीचे उद्घाटन रविवार, दि. 12 ऑक्टोबर रोजी सकाळी 11 वाजता होणार आहे. हा सोहळा सर्वोच्च न्यायालयाचे सरन्यायाधीश भूषण रामकृष्ण गवई यांच्या हस्ते पार पडणार आहे.
यावेळी होणाऱ्या कार्यक्रमाचे अध्यक्षस्थान मुंबई उच्च न्यायालयाचे मुख्य न्यायमूर्ती चंद्रशेखर हे भूषविणार आहेत. कार्यक्रमास राज्याचे मुख्यमंत्री देवेंद्र फडणवीस हे मुख्य अतिथी म्हणून उपस्थित राहणार आहेत. या प्रसंगी उपमुख्यमंत्री एकनाथ शिंदे, उद्योगमंत्री व पालकमंत्री उदय सामंत, गृहराज्यमंत्री योगेश कदम, मुंबई उच्च न्यायालयाचे न्यायमूर्ती मकरंद कर्णिक आणि न्यायमूर्ती माधव जामदार उपस्थित राहणार आहेत.
लोकार्पण सोहळा समारंभानंतर स्वागत समारंभ डॉ. बाबासाहेब आंबेडकर हायस्कूल, मंडणगड येथे आयोजित करण्यात आला असून, मंडणगड आणि संपूर्ण रत्नागिरी जिल्ह्यातील न्यायालयीन यंत्रणेच्या दृष्टीने हा एक ऐतिहासिक दिवस ठरणार आहे.
