कणकवली : अवैध धंद्यांविरोधात पोलिसांनी धडक कारवाई सुरू केली असून रविवारी पहाटे 4 वा.च्या सुमारास केलेल्या कारवाईत अवैधरीत्या गांजा विक्रीवर छापा टाकत संशयिताला ताब्यात घेतले. कणकवली-बांधकरवाडी येथे भाड्याच्या घरात ही गांजा विक्री केली जात होती. स्थानिक गुन्हा अन्वेषणच्या पोलिस पथकाने त्या घरावर छापा टाकत लपवून ठेवलेली गांजाची तब्बल 30 पाकिटे जप्त केली. तसेच शुभम ऊर्फ कुंदन संतोष गोसावी (वय 20, कणकवली-बांधकरवाडी) याला ताब्यात घेतले.
कणकवली-बांधकरवाडी येथे भाड्याने राहत असलेला एक तरुण गांजा विक्री करत असल्याची माहिती स्थानिक गुन्हा अन्वेषणच्या पोलिसांना मिळाली होती. त्या आधारे स्थानिक गुन्हा अन्वेषणचे पोलिस उपनिरीक्षक अनिल हाडळ, सहा. उपनिरीक्षक राजू जामसंडेकर, हवालदार घोन्सालवीस, एम. पी. राणे, डी. एस. डिसोजा, पी. एस. कदम, बी. पी. डिसोजा, महिला पोलिस हवालदार आर. आर. खानोलकर, कॉ. डी. जी. तवटे यांच्या पथकाने रविवारी पहाटे 4 वा.च्या सुमारास बांधकरवाडी येथे जात त्या घराजवळ सापळा लावला.
उपनिरीक्षक अनिल हाडळ यांनी घराचा दरवाजा ठोठावून संशयित शुभम गोसावी याला उठविले. त्यानंतर घराची झडती घेतली असता, हॉलमधील एका बॅरेलमध्ये कपड्यांच्या खाली लपविलेली गांजाची तब्बल 30 पाकिटे आढळून आली. या गांजाचे वजन 380 ग्रॅम आहे.
