सावंतवाडी : तळवडे-कुंभारवाडी येथील सखाराम सोनू कुंभार (वय 70) हे मासे पकडण्यासाठी ओहोळामध्ये गेले असता पाय घसरून पडल्याने त्यांचा पाण्यात बुडून मृत्यू झाला. सोमवारी संध्याकाळी त्यांचा मृतदेह आढळून आला. पोलिसांनी घटनास्थळी पंचनामा केला. याप्रकरणी पोलीस ठाण्यात आकस्मिक मृत्यूची नोंद करण्यात आली आहे.
सखाराम कुंभार हे रविवारी मासे पकडण्यासाठी तळवडे परिसरातील एका ओहोळामध्ये गेले होते. मासे पकडण्याच्या प्रयत्नात अचानक त्यांचा पाय घसरला आणि ते ओहोळाच्या पाण्यात पडले. बराच वेळ झाला तरी ते घरी परतले नाहीत त्यामुळे कुटुंबीयांनी त्यांची शोधाशोध केली. अखेर सोमवारी संध्याकाळी उशिरा त्यांचा मृतदेह ओहोळात आढळून आला. घटनेची माहिती मिळताच सावंतवाडी पोलिसांनी तत्काळ घटनास्थळी धाव घेतली.
पोलिसांनी मृतदेहाचा पंचनामा केला आणि मृतदेह शवविच्छेदनासाठी पाठवण्यात आला. या प्रकरणी सावंतवाडी पोलीस अधिक तपास करत आहेत. सखाराम कुंभार यांच्या दुर्दैवी निधनामुळे तळवडे - कुंभारवाडी परिसरात शोककळा पसरली आहे.
