आंबोली : नागपूर ते गोवा आंबोलीमार्गे माल वाहतूक करणारा टेम्पो आंबोली घाटातील नाना पाणी येथे सुमारे 50 फूट दरीत कोसळून अपघात झाला. यात सुदैवाने चालक सुमित दत्ताजी उजवे (34, रा. नागपूर, आठवा मैल, दौलामेटी, माळा कॉलनी) हा जखमी झाला आहे. ही घटना रविवारी दुपारी घडली. सदर अपघातात टेम्पोचे मोठे नुकसान झाले आहे.
आयशर टेम्पो चालक सुमीत उजवे हा पावडर घेऊन नागपूरहून आंबोली घाटमार्गे गोव्याकडे जात होता. आंबोली घाटातील नाना पाणी वळणावर आला असता टेम्पोचे ब्रेक निकामी झाल्याने चालकाचे नियंत्रण सुटले अन् टेम्पो दरीत कोसळला.
या घटनेची माहिती मिळताच स्थानिकांनी तत्काळ घटनास्थळी धाव घेतली आणि चालकाला बाहेर काढले. या अपघातात टेम्पोचे मोठे नुकसान झाले आहे. पुढील तपास पोलिस करत आहेत.
