रत्नागिरी : पुढारी वृत्तसेवा
फेसबुकवरील रिल्सच्या नादी लागून वृद्धाने ९ लाख २१ हजार ७०१ रुपये गमावल्याची घटना शहरातील भाटिमिऱ्या परिसरात घडली आहे. याप्रकरणी शहर पोलिस ठाण्यात अमित चव्हाण (रा. उत्तर प्रदेश) याच्याविरोधात गुन्हा दाखल करण्यात आला आहे.
त्याच्याविरोधात हेमंत मारुती शिवलकर (वय ७१, रा. नवीन दत्तमंदिर भाटिमिऱ्या, रत्नागिरी) यांनी मंगळवारी दिलेल्या तक्रारीनुसार, ऑगस्ट २०२५ ते जानेवारी २०२६ या कालावधीत त्यांनी फेसबुकवर रिल्स आणि जाहिराती पाहताना त्यांची संशयित अमित चव्हाणशी ओळख झाली होती.
फिर्यादीचा विश्वास संपादन केल्यानंतर अमितने फिर्यादीला ५ रुपयांच्या नोटेवर ट्रॅक्टरचे चित्र असल्यास १५ लाख रुपये मिळतील, असे आमिष दाखवले होते. शिवलकर यांना ती १५ लाखांची रक्कम देण्यासाठी संशयिताने त्यांच्याकडून विविध बँक खात्यांमध्ये तसेच गुगल पेच्या माध्यमातून तब्बल ९ लाख २१ हजार ७०१ रुपये लाटले.
तसेच फिर्यादीच्या नावे असलेल्या बँक खात्यांचा वापर करून त्यामध्ये इतर लोकांना फसवून त्यांची रक्कम फिर्यादीच्या बँक खात्यात जमा करून नंतर ती काढून घेतली असल्याचे वृत्त आहे. शिवलकर हे वयोवृद्ध असल्याने व नियमितपणे बँकेत आपल्या खात्याची माहिती घेण्यासाठी जात नसल्याने अडीच महिन्यांनंतर बँकेकडून माहिती घेतल्यानंतर हा सर्व फसवणुकीचा प्रकार त्यांच्या लक्षात आला. त्यांनी तातडीने शहर पोलिस ठाण्यात धाव घेत तक्रार दिली आहे.
