खेड : रत्नागिरी जिल्ह्यातील खेड शहरातून खारी गावाकडे जाणाऱ्या मार्गावरील पुलाखाली मंगळवार दि. २६ रोजी एक थरारक घटना घडली. एका वृद्ध महिलेचा पाण्यात बुडून जीव जाण्याची वेळ आली असताना स्थानिक युवक शिवम शिबे यांनी प्रसंगावधान राखत धाडसी बचावकार्य करून तिचा जीव वाचवला.
मिळालेल्या माहितीनुसार, संबंधित वृद्ध महिला पुलाखालील पाण्यात बुडत असल्याचे शिवम शिबे यांच्या निदर्शनास आले. परिस्थितीचे गांभीर्य ओळखत त्यांनी क्षणाचाही विलंब न करता खोल नदीपात्रात उडी घेतली. स्वतःच्या जीवाची पर्वा न करता त्यांनी महिलेपर्यंत पोहोचून तिला सुरक्षित बाहेर काढले.
या धाडसी आणि मानवतावादी कृतीमुळे परिसरात एकच कौतुकाची लाट उसळली असून “देवदूत बनून आला तरुण” अशा शब्दांत नागरिकांकडून शिवम शिबे यांचे अभिनंदन करण्यात येत आहे. दरम्यान, शिंदे यांच्या शिवसेनेतर्फे खेड शहर शाखेमध्ये शिवम शिबे यांचा तत्काळ सत्कार करण्यात आला. त्यांच्या धाडसाचे आणि सामाजिक बांधिलकीचे सर्व स्तरांतून कौतुक होत आहे.
