राजापूर : राजापूर तालुक्यातील मजरे जुवे (भालावली) येथे मुचकुंदी नदीच्या किनाऱ्यालगत मृतावस्थेत सापडलेल्या बिबट्याबाबत उलट सुलट प्रश्न उपस्थित होत असतानाच फासकीत अडकून बिबट्याचा मृत्यू झाला असल्याचे राजापूरचे पशु वैद्यकीय अधिकारी यांनी सांगितल्याची माहिती राजापूरचे वनपाल जयराम बावधाने यांनी दिली. दरम्यान, मृत बिबट्याचे शवविच्छेदन करण्यात आले असून सर्व अवयव सुस्थितीत असल्याची माहिती देण्यात आली. तर बिबटयाच्या मृत्यूस कारणीभूत ठरलेल्या संशयित गुन्हेगारावर गुन्हा दाखल करण्यात आला आहे.
राजापूर तालुक्यातील मजरे जुवे (भालावली) येथे मुचकुंदी नदीच्या किनाऱ्यालगत फासकीत अडकून बिबटया हा वन्यप्राणी मृत्यूमुखी पडल्याचे वृत्त सोशल मीडियावर एका प्रसिद्ध झालेल्या व्हिडीओद्वारे पसरले आणि तालुक्यात जोरदार खळबळ उडाली होती. दरम्यान, बिबट्याच्या मृत्यूस कारणीभूत ठरलेल्या अज्ञात आरोपी विरोधात वनविभागाने विभागीय वन अधिकारी, (चिपळूण, रत्नागिरी) यांच्या मार्गदर्शनाखाली गुन्हा दाखल केला असून या बिबट्याच्या मृत्यूस कारणीभूत ठरलेल्यांचा शोध वनविभागाकडून सुरु असल्याची माहिती राजापूरचे वनपाल जयराम बावधाने यांनी दिली.
राजापूरच्या पशुवैद्यकीय अधिकाऱ्यांच्या वतीने मृत बिबट्याचे शवविच्छेदन करण्यात आले. त्याचे चारही पंजासह सर्व अवयव सुस्थितीत होते. मात्र, तो कुजलेल्या अवस्थेत होता. मृत बिबटया हा कुणी अज्ञाताने लावलेल्या फासकीत अडकून मृत झाला असल्याची माहिती राजापूरच्या पशु वैद्यकीय अधिकाऱ्यांनी दिल्याचे राजापूरचे वनपाल जयराम बावधाने यांनी पत्रकारांना माहिती दिली. या प्रकरणी पुढील तपास सहायक वनसंरक्षक रत्नागिरी व वन परिक्षेत्र अधिकारी हे करत आहेत,अशी माहिती देण्यात आली.
