गणपतीपुळे : पुढारी वृत्तसेवा
लाखो भाविकांचे श्रद्धास्थान असलेल्या श्री क्षेत्र गणपतीपुळे येथील स्वयंभू श्री गणपती मंदिरात आता भाविकांना भारतीय परंपरेला साजेशी वेषभूषा करूनच दर्शनाला प्रवेश मिळणार आहे. संस्थान श्री देव गणपतीपुळेच्या पंच समितीने १ जानेवारी २०२७ पासून मंदिरात 'ड्रेस कोड' बंधनकारक करण्याचा अंतिम निर्णय घेतला आहे. त्या बाबतचे जनजागृतीपर फलक मंदिर परिसरात लावण्यात आले आहेत.
संस्थानकडून यापूर्वीही वस्त्रसंहितेबाबत भाविकांना सूचना देण्यात आल्या होत्या. आता १ जानेवारीपासून नियमांची काटेकोर अंमलबजावणी करण्यात येणार असल्याचे स्पष्ट करण्यात आले आहे. मंदिर हे सर्वांचे श्रद्धास्थान असल्याने दर्शनासाठी येताना भारतीय परंपरेला साजेशी व सभ्य वेषभूषा परिधान करावी, असे आवाहन मंदिर प्रशासनाने केले आहे.
समुद्रकिनाऱ्यावरील पेहराव मंदिरात नको!
गणपतीपुळे हे प्रसिद्ध पर्यटनस्थळ असल्याने समुद्रकिनारी फिरण्यासाठी येणारे पर्यटक मंदिरातही दर्शनासाठी जातात. मात्र, समुद्रकिनाऱ्यावर जाण्यासाठीचा पेहराव मंदिरात परिधान करून येऊ नये, अशी सूचना करण्यात आली आहे. कमी कपड्यांचा पोशाख, गुडघ्याच्या वर येणारे स्कर्ट किंवा ड्रेसेस तसेच असभ्य भाषा अथवा आक्षेपार्ह चित्रे असलेले कपडे परिधान करून मंदिरात प्रवेश करता येणार नाही.
अशा वेषभूषेतील भाविकांना दर्शनासाठी प्रवेश नाकारला जाईल. यासाठी मंदिर प्रशासनावर कोणत्याही प्रकारचा दबाव आणू नये, असेही सूचनाफलकावर स्पष्ट करण्यात आले आहे. मात्र, १० वर्षांखालील मुलांना वस्त्रसंहितेच्या नियमातून सूट देण्यात आली आहे.
