देवरुख: वाळू वाहतुकीवरून झालेल्या वादातून एका डंपरचालकाला भररस्त्यात अडवून बंदुकीचा धाक दाखवून धमकावल्याची गंभीर घटना बुधवारी संगमेश्वर तालुक्यात घडली आहे. या प्रकरणी संगमेश्वर पोलिसांनी आरोपीविरुद्ध गुन्हा दाखल करण्यात आला आहे.
करजुवे ते माखजन मार्गावर दिवसाढवळ्या झालेल्या या प्रकारामुळे परिसरात खळबळ उडाली आहे. मिळालेल्या माहितीनुसार, फिर्यादी हर्षद एकनाथ साळुंखे (25, रा. चिखली, साळुंखेवाडी, ता. संगमेश्वर, जि. रत्नागिरी) हे बी. कॉम. पर्यंत शिक्षण झालेले असून, ते डंपर चालक म्हणून व्यवसाय करतात. 26 नोव्हेंबर रोजी सकाळी 11.30 वाजण्याच्या सुमारास हर्षद साळुंखे हे त्यांच्या ताब्यातील (एम.एच.08/ए.पी 6534) या डंपरमध्ये करजुवे येथून वाळू भरून ते कडवई येथे घेऊन जात होते.
दरम्यान, करजुवे गावाजवळ याच रस्त्यावर संशयित सूरज उदय नलावडे (26, रा. करजुवे वातवाडी, ता. संगमेश्वर) याने त्यांचा डंपर अडवला. संशयित सूरज नलावडे हा डंपरजवळ आला आणि त्याने थेट डंपरची चावी मागितली. फिर्यादी हर्षद साळुंखे यांनी चावी मागण्याचे कारण विचारून चावी देण्यास स्पष्ट नकार दिला.
या गोष्टीचा संशयित सुरज नलावडे याला प्रचंड राग आला. तो दारूच्या नशेत होता. त्याने तातडीने त्याचे सोबत आणलेली ग्रे रंगाची स्वीफ्ट डिझायर गाडी चालू केली आणि डंपरसमोर आडवी लावून फिर्यादीचा रस्ता पूर्णपणे अडवला.
यानंतर संशयित सूरज नलावडे गाडीतून खाली उतरला, तेव्हा त्याच्या हातात सिंगल बॅरल काडतुसची बंदूक होती. त्याने बंदुकीचा धाक दाखवत डंपरचा दरवाजा उघडला आणि जबरदस्तीने डंपरची चावी काढून घेतली. अश्लील शब्द वापरून दम असेल तर माझ्या घरातून चावी घेऊन जायला सांग, अशी उघड धमकी आरोपीने डंपर चालकाला दिली आणि चावी सोबत घेऊन तो निघून गेला.
या गंभीर घटनेनंतर डंपर चालक हर्षद साळुंखे यांनी तातडीने माखजन पोलीस दूरक्षेत्र येथे तक्रार दाखल केली. त्यांच्या तक्रारीवरून, माखजन पोलीस दूरक्षेत्राच्या अकर्सन्स नंबर 61/2025 वरून, संगमेश्वर पोलीस ठाण्यात गु.आर.क्र. 133/2025 नुसार संशयित सूरज नलावडे याच्याविरुद्ध भारतीय न्यायसंहिता अधिनियम 2023 चे कलम 126 (2), 352 (हल्ला किंवा फौजदारी बळाचा वापर) आणि भारतीय हत्यार कायदा कलम 3/25 (बेकायदेशीररित्या शस्त्र बाळगणे) या कलमांखाली गुन्हा दाखल करण्यात आला आहे.
