चिपळूण : भारतीय जनता पार्टीचे उपजिल्हाध्यक्ष परिमल भोसले यांनी भाजप पक्ष सदस्यत्व आणि पदाचा राजीनामा दिला आहे. भाजपाने जाहीर केलेल्या उमेदवारांच्या पहिल्या यादीत नाव नसल्याने त्यांनी हा निर्णय पत्रकार परिषदेत जाहीर केला. आपण प्रभाग क्र. 9 मधून अपक्ष म्हणून निवडणूक लढवणार, असा निश्चय त्यांनी यावेळी व्यक्त केला.
या पार्श्वभूमीवर परिमल भोसले म्हणाले, आपण गेली आठ वर्षे भाजपमध्ये निष्ठेने काम केले. मात्र, या निवडणुकीत आपल्याला विश्वासात घेतले गेले नाही. आपला 9 नंबरचा प्रभाग सर्वसाधारण उमेदवारासाठी आरक्षित असताना त्या ठिकाणी ओबीसी प्रवर्गात येणारे व शहर मंडल अधिकारी शशिकांत मोदी यांना उमेदवारी जाहीर केली. या ठिकाणी गोखले, कदम व आपण इच्छुक असताना या प्रभागातून ओबीसी व्यक्तीला उमेदवारी दिली आणि पक्षाने आपला विचार केला नाही. तिघांपैकी कोणालाही उमेदवारी मिळाली असती, तर आपले म्हणणे नव्हते. पक्षाने आपल्याला विचारात घेतले नाही. पक्ष निरीक्षकांना ही बाब आपण समजून सांगितली. मात्र, त्यांनी पाच वर्षे स्वीकृत नगरसेवक पदाची संधी देतो अशी आपल्याला ऑफर दिली. मात्र, ती आपण नाकारली.
शशिकांत मोदी हे भाजपाचे मंडल अध्यक्ष आहेत. असे असताना त्यांना ज्या ठिकाणी ओबीसी प्रभाग आरक्षित आहे, तेथून उमेदवारी देणे गरजेचे होते किंवा संपूर्ण शहराची जबाबदारी त्यांच्यावर द्यायची होती. ते मंडल अध्यक्ष झाल्यापासून पक्षातील अनेक लोक नाराज आहेत. त्यांच्यात खदखद आहे. ही लोकांची खदखद माझ्या माध्यमातून बाहेर येत आहे. मंडल अध्यक्ष पदासाठी देखील 13 जण इच्छुक होते. त्यातील एकाची निवड अपेक्षित होती. मात्र, बाहेरून आलेल्या व्यक्तिला हे पद देण्यात आले. यामुळे दोन दिवसांत अनेकजण भाजपचा राजीनामा देणार असल्याचे भोसले यांनी जाहीरपणे सांगितले. आपण 9 नंबर प्रभागातून अपक्ष निवडणूक लढविणार, असा त्यांनी पुनरूच्चार केला. राणे कुटुंबाविषयी आपल्या मनात प्रेम आहे. तो आदर कायम राहील. मात्र, आपण पक्षाला सोडचिठ्ठी देत असल्याचे त्यांनी सांगितले.
