गणपतीपुळे : रत्नागिरी जिल्ह्यातील प्रसिद्ध तीर्थक्षेत्र असलेल्या गणपतीपुळे येथे 12 ऑगस्ट रोजी अंगारकी चतुर्थी यात्रोत्सव होणार आहे. या पार्श्वभूमीवर नियोजनात्मक बैठक 7 ऑगस्ट रोजी गणपतीपुळे देवस्थानच्या सभागृहात सायंकाळच्या सुमारात रत्नागिरीचे तहसीलदार राजाराम म्हात्रे व प्रांताधिकारी जीवन देसाई यांच्या प्रमुख उपस्थितीत पार पडली. यावेळी बारा रोजी होणार्या अंगारकी चतुर्थी यात्रोत्सवाचे अतिशय चोख नियोजन करून सर्व यंत्रणांना सतर्क राहण्याच्या सूचना तहसीलदार व प्रांतधिकार्यांनी दिल्या आहेत या बैठकीत गणपतीपुळे येथे अंगारकी यात्रा उत्सवाच्या निमित्ताने येणार्या सर्व भाविकांना दर्शनाची व अन्य सर्व व्यवस्था अतिशय सुरळीतरित्या उपलब्ध होण्याच्या दृष्टीने तहसीलदार व प्रांताधिकारी यांनी गणपतीपुळे ग्रामपंचायत, देवस्थान समिती, पोलीस यंत्रणा, महावितरण, आरोग्य विभाग, आरटीओ, आपत्ती व्यवस्थापन विभाग, महसूल विभाग आदी यंत्रणांना सतर्क राहण्याच्या सूचना दिल्या आहेत. या अंगारकीच्या पार्श्वभूमीवर सर्व यंत्रणांनी आपापल्या कामांची विभागणी करून सर्व कामे योग्य प्रकारे पूर्ण करावीत तसेच येणार्या भाविकांना कुठल्याही प्रकारची गैरसोय जाणवणार नाही या दृष्टीने चोख नियोजन करावे अशा स्वरूपाच्या सूचना देण्यात आल्या.
या अंगारकी चतुर्थी उत्सवाच्या निमित्ताने स्वयंभू श्रींचे मंदिर पहाटे साडेतीन वाजता दर्शनासाठी खुले होणार असून प्रारंभी गणपतीपुळे मंदिराचे मुख्य पुजारी यांच्या हस्ते श्रींची पूजा अर्चा, मंत्र पुष्प व आरती झाल्यानंतर भाविकांना मंदिरात दर्शनासाठी सोडण्यात येणार आहे. त्यानंतर पहाटे साडेतीन ते रात्री साडेदहा वाजेपर्यंत एकूण 18 तासांच्या कालावधीत भाविकांना दर्शनाची सोय उपलब्ध होणार आहे. या निमित्ताने यंदा 50 ते 60 हजार भाविक दर्शनासाठी येतील असा अंदाज व्यक्त करण्यात आला आहे. तसेच यंदा अंगारकीचा योग श्रावण महिन्यात जुळून आल्याने यावर्षी मोठी गर्दी होईल असा अंदाज व्यक्त केला जात आहे.
संपूर्ण मंदिर आणि गणपतीपुळे परिसरात परिसरात भाविकांच्या गर्दीवर नियंत्रण ठेवण्यासाठी अत्यंत नेटके नियोजन करण्याचे सूचना देण्यात आल्या आहेत .तसेच या निमित्ताने भाविकांच्या वाहनांची पार्किंग व्यवस्था करण्यासाठी गणपतीपुळे येथील सागर दर्शन पार्किंग, महालक्ष्मी हॉल आणि गणपतीपुळे खारभूमी मैदान या भागात पार्किंगची व्यवस्था करण्यात येणार आहे. या अंगारकीच्या पार्श्वभूमीवर गणपतीपुळे परिसरातील सर्व खड्डे बुजवण्याच्या भरून सूचना संबंधित बांधकाम विभागाला देण्यात आल्या आहेत तसेच समुद्राच्या समुद्राची धोक्याची स्थिती लक्षात घेऊन येणार्या भाविकांना सूचना मिळाव्यात यासाठी गणपतीपुळे ग्रामपंचायत आणि सर्व यंत्रणांच्या वतीने माहिती फलक लावण्याच्या सूचना देण्यात आल्या आहेत.या बैठकीला रत्नागिरीचे तहसीलदार राजाराम म्हात्रे, प्रांताधिकारी जीवन देसाई यांचेसमवेत संस्थान श्री देव गणपतीपुळे चे सरपंच डॉ. श्रीराम केळकर ,पंच अमित मेहेंदळे, विद्याधर शेंडे ,लिपिक महेश भिडे गणपतीपुळेच्या सरपंच कल्पना पक्कये, जयगड पोलीस ठाण्याचे पोलीस निरीक्षक कुलदीप पाटील आदी मान्यवर व विविध खात्यांचे प्रतिनिधी उपस्थित होते. या बैठकीच्या प्रारंभी उपस्थितांचे स्वागत देवस्थानचे मुख्य लिपिक महेश भिडे यांनी केले तर आभार प्रदर्शन प्रांत अधिकारी जीवन देसाई यांनी केले.
