चिपळूण : पुढारी वृत्तसेवा
नगर परिषद सार्वत्रिक निवडणुकांच्या जाहीर झालेल्या आरक्षणानंतर चिपळूण न. प. मध्ये सर्वपक्षीय महिला व पुरूष इच्छुक उमेदवारांना दिलासा मिळाला आहे. मागीलप्रमाणेच द्विसदस्यीय प्रभागाबरोबरच सदस्यांमधून नगराध्यक्ष निवड होणार आहे. नगराध्यक्ष निवडीमध्ये महिला नगरसेविका मतदारांचे वर्चस्व राहणार असल्यामुळे न.प.तील सत्तेची चावी महिलांच्या हातात राहणार असल्याचे चित्र स्पष्ट झाले आहे.
चिपळूण न.प.त 14 प्रभागांतून 28 सदस्यसंख्या झाली असून, चार स्वीकृत सदस्य न.प. सभागृहात जाणार आहेत. न.प.च्या आरक्षण सोडतीमध्ये ओबीसी आरक्षण संपुष्टात आल्याने सर्वच प्रभागातून महिला उमेदवारांना निवडणूक लढविण्याची संधी मिळणार आहे. चिपळूण न. प. अंतर्गत राजकीय पक्षांची ताकद लक्षात घेता शहर व तालुक्यात सद्यस्थितीत शिवसेना मजबूत स्थितीत आहे. प्रामुख्याने सेनेकडे शहरासहीत तालुक्यात महिला आघाडी सक्षम व सक्रिय आहे. प्रत्येक प्रभागातून शिवसेना संघटनेच्या महिला आघाडीतील सदस्यांची संख्या लक्षणीय आहे. त्या पाठोपाठ राष्ट्रवादीदेखील शहरात महिला संघटना सक्षम करण्यात गुंतलेली आहे. मात्र, सेनेच्या तुलनेत राष्ट्रवादीची महिला संघटना त्या मानाने कमकुवत आहे. त्याचबरोबर काँग्रेस पक्षाकडून शहरातील महिला संघटना बांधणीचे काम सुरू आहे. मात्र, आवश्यक त्या प्रमाणात काँग्रेस पक्षाकडे संघटित महिलांची ताकद कमी आहे.
गेली पाच वर्षे सत्तेत राहणार्या भाजपची मात्र महिला संघटना बांधणी अत्यंत कमकुवत आहे. चिपळुणात भाजपची एकूणच संघटीत कार्यशक्ती अत्यंत तुटपुंजी आहे. हाताच्या बोटावर मोजता येतील इतके कार्यकर्ते, त्यातही पदाधिकार्यांची संख्या जास्त अशी स्थिती शहरातील भाजपची आहे. पाच वर्षे सत्तेत राहूनही भाजपला शहरात म्हणावे तसे संघटन करण्यात यश आले नाही. मात्र, शिवसेनेने शहरातील महिला संघटना प्रत्येक प्रभागापासून सक्षम व मजबूत केली आहे. सेनेकडे 50 टक्के राखीव कोट्यातील 14 महिला उमेदवार देण्याची ताकद आहे.
हे उमेदवार त्या-त्या प्रभागातील नागरिकांशी कायमचे संपर्कात असल्याचा फायदा संघटनेला होऊन महिला उमेदवार सहज निवडून येऊ शकतात. ज्या पक्षातील जास्तीत जास्त महिला उमेदवार विजयी होतील, त्या पक्षाला सदस्यांतून नगराध्यक्ष निवडून देणे महिला नगरसेवकांच्या मतांवर सोपे होणार आहे. एकूणच सत्तेची चावी महिलांच्या हातात राहाणार आहे.
भाजपला प्रत्येक प्रभागात महिला उमेदवार उभा करण्यासाठी इतर पक्षातील नाराज महिला उमेदवारांना संधी कशी देता, येईल यासाठी राजकीय डावपेच सुरू झाले आहेत. भाजपला शहरात स्वत:चे प्रत्येक प्रभागात महिला उमेदवार निर्माण करण्यात अपयश आले आहे. त्याचबरोबर शहरातील सर्वच प्रभागातून भाजपकडे आवश्यक असणार्या उमेदवारांची संख्या सद्यस्थितीत दिसून येत नाही. त्यामुळे भाजपला इतर पक्षातील नाराज असलेल्या उमेदवारांचा शोध घेऊन त्यांना संधी देण्याचे राजकारण सुरू झाले
आहे.
राष्ट्रवादीमध्ये मागील सभागृहात सक्षम महिला उमेदवारांचे वर्चस्व होते. मात्र, राष्ट्रवादी अंतर्गत हेवेदाव्यात काही माजी नगरसेविका मूळ प्रवाहापासून कायमच दूर राहिल्या आहेत. मात्र, आता निवडणुका आल्यावर पुन्हा सक्रिय झाल्याने इच्छुक महिलांची संख्या वाढली आहे. काँग्रेसमध्ये सर्वच प्रभागात महिला उमेदवार देण्याइतपत पक्षाची ताकद निर्माण झालेली नाही. या सर्व राजकीय घडामोडीत शिवसेना मात्र सद्यस्थितीत शहरात महिला उमेदवारांच्या बाबतीत सक्षम असल्याचे दिसून येते.
पन्नास टक्के राखीव कोट्यातून 14 महिलांना हक्काची संधी मिळणार आहे, तर उर्वरित 14 कोटा हा खुल्या गटासाठी असल्याने त्या ठिकाणीही महिलांना निवडणूक लढविता येणार आहे. एकूणच चित्र पाहता शहरातील सर्व प्रभागातून महिलांना निवडणूक लढविण्याची संधी उपलब्ध झाली आहे.
