सिंधुदुर्ग ; पुढारी वृत्तसेवा : 'कोंड नेस्ट ट्रॅव्हलर' या मासिकाने यंदाच्या वर्षी भेट देण्यासाठी जगातील 30 सर्वांत सुंदर पर्यटनस्थळांची यादी जाहीर केली आहे. यामध्ये महाराष्ट्रातील एकमेव अशा सिंधुदुर्गनगरीचा समावेश करण्यात आला आहे.
लंडन, सिसिली, सिंगापूर यासह इस्तंबूल, इजिप्त, माल्टा, सर्बिया, केपवर्दे अशा आंतरराष्ट्रीय तसेच सिक्कीम, मेघालय, ओडिशा, राजस्थान, गोवा, कोलकाता, भीमताल, केरळमधील आयमानम अशा 9 भारतीय पर्यटनस्थळांचा यामध्ये समावेश आहे.
कोंड नेस्ट ट्रॅव्हलर (इंडिया) हे मासिक असून, त्यांची वेबसाईट आहे. ते दरवर्षी जगातील सुंदर पर्यटनस्थळांची यादी प्रसिद्ध करतात. त्यामध्ये या पर्यटनस्थळांची संपूर्ण माहिती दिली जाते. जागतिकस्तरावरील पर्यटनास चालना देण्यासाठी त्यांच्याकडून हा उपक्रम दरवर्षी राबवला जातो. यंदाच्या सर्वांग सुंदर पर्यटनस्थळांमध्ये सिंधुदुर्ग जिल्ह्याचा समावेश करण्यात आल्यामुळे पर्यटनाच्या दृष्टीने सिंधुदुर्ग आंतरराष्ट्रीय दर्जाचा जिल्हा असल्याचे शिक्कामोर्तब झाले आहे.
स्वच्छ सुंदर किनारे, समुद्रातील प्रवाळ, सिंधुदुर्ग किल्ला, त्सुनामी आयलंड यासारख्या पर्यटनस्थळांविषयी थोडक्यात माहिती देण्यात आली आहे. तसेच स्कुबा डायव्हिंगची सोय, समुद्री जीवनाच्या दर्शनाची सोयही उपलब्ध असल्याची माहिती देण्यात आली आहे. चिपी विमानतळ सुरू झाल्यामुळे सिंधुदुर्गातील पर्यटन सोपे झाल्याने जागतिक पर्यटनाच्या नकाशावर सिंधुदुर्ग पोहोचला आहे.
या यादीमध्ये श्रीलंका, भूतान, कतार, जपान, यूएई, इजिप्त, ओक्लाहोमा, सेऊल, गोबन, उझबेकिस्तान यासारख्या पर्यटनस्थळांचा समावेश आहे. आता या आंतरराष्ट्रीय दर्जाच्या पर्यटनस्थळांच्या यादीत सिंधुदुर्गचा समावेश झाला आहे. पर्यटनाच्या दृष्टीने खर्या अर्थाने सिंधुदुर्ग हे आंतरराष्ट्रीय पर्यटनाच्या नकाशावर आल्याचे दिसून येते.
* भारतातील 9 स्थळांना मिळाले स्थान
* जिल्ह्यासाठी अभिमानाची गोष्ट : जिल्हाधिकारी
* महाराष्ट्रातील एकमेव सिंधुदुर्ग जिल्हा
जगातील सर्वात सुंदर 30 पर्यटनस्थळांच्या यादीमध्ये सिंधुदुर्ग जिल्ह्याचा समावेश असणे, ही खरोखरच जिल्ह्यासह राज्यासाठी मोठी अभिमानाची गोष्ट आहे.
– के. मंजुलक्ष्मी, जिल्हाधिकारी
