अंबड ; पुढारी वृत्तसेवा : तालुक्यातील शेवगा येथुन २ सख्ख्या बहिणी व मेहुणा असे ३ जण दुचाकीने अंबड मार्गे औरंगाबादकडे जात होती. डाबरूळ फाट्यावरून औरंगाबादकडे जाण्यासाठी वळत असताना कंटेनर दुचाकी अपघातात दोन सख्ख्या बहिणी जागीच मृत्यू झाला. तर एक जण गंभीर झाला.
औरंगाबाद तालुक्यातील शेवगा येथुन २ सख्ख्या बहिणी व मेहुणा असे ३ जण दुचाकी (क्र. एम.एच.२० एफ.ई.७६३६) ने अंबड मार्गे औरंगाबादकडे जात होती. डाबरूळ फाट्यावरून औरंगाबादकडे जाण्यासाठी वळत असताना अंबड शहराकडून जालनाकडे जाणाऱ्या भरधाव कंटेनरने (क्र. एच.आर.३८ यु ६५४१) मोटरसायकलला जोराची धडक दिली.
ही धडक इतकी जोरदार होती की, यात दुचाकी लांबवर फरफटत गेली. या अपघातात मोटारसायकलवरील २ सख्ख्या बहिणींचा जागीच मृत्यू झाला. तर मेहुणा गंभीर जखमी झाला.
हा अपघात सोमवारी (दि.०९) रोजी दुपारी ३ वाजण्याच्या सुमारास घडला. जालना-अंबड रोडवरील डांबरुळ फाट्यावर ही घटना घडली. यातील दोन्ही बहिणी या अंबड तालुक्यातील शेवगा येथील होत्या.
याबाबत मिळालेली अधिक माहिती अशी की, अंबड तालुक्यातील शेवगा येथील रेखा रामेश्वर भिसे या बहिणीला तिची बहीण मुळगाव (ताडहादगाव, ता.अंबड) सध्या औरंगाबाद येथे वास्तव्यास असलेल्या सुनीता विठ्ठल खरजूले व त्यांचे पती विठ्ठल सर्जेराव खरजूले हे औरंगाबाद येथून शेवगा (ता.अंबड) येथे बहीणीला भेटण्यासाठी आले होते.
सोमवारी (दि. ९) रोजी शेवगा येथून दोघी बहिणी व रामेश्वर खरजूले हे तिघे दुचाकीवरून औरंगाबादकडे जाण्यासाठी निघाले असता अंबड मार्गे डाबरूळ फाट्यावरून औरंगाबाद रोडकडे आपली मोटरसायकल वळवत असताना अंबड कडून जालनाकडे जाणाऱ्या भरधाव कंटेनरनने दुचाकीला जोराची धडक दिली.
या अपघातामध्ये सुनीता विठ्ठल खरजूले (वय २८ वर्षे),रेखा रामेश्वर भिसे (वय ३० वर्षे) या जागीच ठार झाल्या. तर विठ्ठल सर्जेराव खरजूले (वय ४० )वर्षे हे गंभीर जखमी झाले आहेत. त्यांच्या पायाला जास्तीचा मार लागला आहे.
या घटनेची माहिती जालना महामार्ग पोलिसांना मिळताच त्यांनी घटनास्थळी तात्काळ धाव घेतली. अंबड पोलिसांनी कंटेनर चालकाला ताब्यात घेतले आहे. दोन्ही मृत महिलांचे मृतदेह उत्तरीय तपासणीसाठी उपजिल्हा रुग्णालयात दाखल करण्यात आले आहे. तसेच विठ्ठल सर्जेराव खरजूले यांना अंबडच्या उपजिल्हा रुग्णालयात दाखल करून पुढील उपचारासाठी जालना येथे हलवण्यात आले आहे.
यावेळी अंबड पोलीस ठाण्याचे पोलीस उपनिरीक्षक सुग्रीव चाटे,आदिनाथ ढाकणे, मनसुब नागवे,संदीप जाधव,विजय पवार,साळवे,हैदर शेख यांनी घटना स्थळाची पाहणी करुन जाम झालेली ट्राफीक पुर्वरत चालु केली. अपघातातील ट्रक व चालकास पोलीसांनी ताब्यात घेतले आहे.अंबड पोलीस ठाण्यात गुन्हा नोंद करण्याची प्रक्रीया चालु आहे.
रेखा रामेश्वर भिसे यांचे पतीचे यापूर्वीच निधन झाले असून त्यांना तीन लहान वयाच्या मुली असल्याने त्यांच्या या अपघाती निधनामुळे परिसरात हळहळ व्यक्त केल्या जात आहे.
