सोलापूर : दक्षिण सोलापूर तालुक्यातील ग्रामीण भागासह सोलापूर दक्षिण मतदारसंघातील जुळे सोलापूर, हद्दवाढ भागातील नागरिकांना भेडसावणार्या मूलभूत समस्या सोडविण्यासह सोलापूर दक्षिण मतदारसंघाच्या सर्वांगीण विकासाचा संकल्प हाच आपला जाहीरनामा असल्याचे धर्मराज काडादी यांनी सांगितले.
शुक्रवारी, श्री सिध्देश्वर सहकारी साखर कारखाना परिसरातील कर्मयोगी आप्पासाहेब काडादी यांच्या साक्षीने सोलापूर दक्षिण विधानसभा मतदारसंघातील अपक्ष उमेदवार, सिध्देश्वर परिवाराचे प्रमुख धर्मराज काडादी यांच्या संकल्प पत्राचे (जाहीरनामा) प्रकाशन दिलीप माने, राजशेखर शिवदारे, सुरेश हसापुरे, बाळासाहेब शेळके, हरीश पाटील, अशोक देवकते, सिद्धाराम चाकोते, शिवानंद पाटील, राधाकृष्ण पाटील, शिवशरण दिंडोरे यांच्यासह इतर मान्यवरांच्या उपस्थितीत झाले. दक्षिण सोलापूरच्या ग्रामीण आणि शहरी भागाच्या सर्वांगीण विकासाच्या या संकल्पपत्रात रस्ते व वाहतूक विकास संकल्प, तालुक्यातील शेतकर्यांच्या व औद्योगिक उन्नतीसाठीचा संकल्प, वीज वितरणाचा संकल्प, शिक्षण विकास, ड्रेनेज लाईन, धार्मिक विकास संकल्पाचा प्रामुख्याने समावेश आहे.
मुस्लिम, मराठा, धनगर, महादेव कोळी, लमाण, बंजारा, लिंगायत व बहुजन समाजातील मुला-मुलींना शिक्षणाच्या प्रवाहात आणण्यासाठी प्रयत्न करणे. मुस्लिम समाजासाठी स्वतंत्र वाचनालयाची स्थापना करून उर्दू भाषेचे जतन व संवर्धन करण्यास सहाय करण्याचा संकल्प या संकल्पपत्रात करण्यात आला आहे.
उजनीचे पाणी दक्षिण सोलापूर, अक्कलकोट व उत्तर सोलापूर व शहर या भागात आणण्यासाठी सर्वसामान्य जनतेच्या पिण्याच्या पाण्याचा प्रश्न व शेतीसाठी पाण्याचा प्रश्न सोडविण्यासाठी राज्यस्तरीय प्रयत्न करणे, वडापूर, टाकळी, बंदलगी येथील सीना-भीमा नदीवर नवीन बॅरेजेस बसविणे, सीना-भीमा या दोन्ही नदीवरील जुन्या बंधार्याची दुरुस्ती, सीना-भीमा नदी जोड कालवा प्रकल्प पूर्ण करण्यासाठी विधानसभेत प्रश्न मांडून त्यांची अंमलबजावणी करण्याचा प्रयत्न करणे आदी संकल्पाचा समावेश आहे.
