भंडारा: शिंदे शिवसेना पक्षाचे उपनेते आणि आमदार नरेंद्र भोंडेकर यांच्याविरोधात भाजपच्या काही जबाबदार पदाधिकाऱ्यांनी गुरुवारी अपमानास्पद भाषा वापरली. हे भाजपच्या संस्कृतीला शोभणारे नाही. या कृत्याचा युवासेना अध्यक्ष जॅकी रावलानी यांनी पत्रकार परिषद घेऊन निषेध केला. यावेळी शहरप्रमुख किशोर नेवारे, शैलेश श्रीवास्तव आदी उपस्थित होते.
रावलानी म्हणाले की, प्रत्येकाला पक्षाचे तिकीट मागण्याचा अधिकार आहे. आम्ही आमच्या उमेदवारासाठी तिकीट मागितले. मात्र भंडारा मतदारसंघाचे तिकीट न मिळाल्याने भाजपचे काही पदाधिकारी आमदार भोंडेकर यांच्याविरोधात अपमानास्पद भाषा वापरत आहेत. ते अपक्ष उमेदवार म्हणून निवडणूक लढविणार असल्याची चर्चा आहे. भाजपचे काही स्थानिक पदाधिकारी महायुती बिघडवत आहेत. याचा निषेध करत रावलानी यांनी अपमानास्पद शब्द वापरणाऱ्या पदाधिकाऱ्यांना निवडणूक लढविण्याचे आव्हान दिले.
भाजपचे तालुका अध्यक्ष विनोद बांते आणि भाजप नेते प्रशांत खोब्रागडे यांनी सभ्य शब्दांचा वापर करावा, असेही ते म्हणाले.भाजपने विदर्भातील विविध जागांवर उमेदवार दिले आहेत. भंडारा येथील भाजपच्या कोणत्याही नेत्याने अपक्ष म्हणून निवडणूक लढवली तर विदर्भातील भाजपच्या उमेदवारांसमोरही आम्ही आमचा उमेदवार उभा करू, असा इशारा त्यांनी दिला.
