पाथर्डी तालुका, पुढारी वृत्तसेवा : मूकबधिर व मतिमंद युवतीवर अत्याचार करणार्यास पोलिसांनी पाच महिन्यांच्या अथक प्रयत्नानंतर शोधून काढले आहे. याप्रकरणी मुलीच्या चुलत्याला पोलिसांनी गजाआड केले आहे. पोलिसांनी त्याला न्यायालयासमोर हजर केले असता, त्याला 30 जुलैपर्यंत पोलिस कोठडीत ठेवण्याचे आदेश न्यायाधीश व्ही. आय. शेख यांनी दिले आहेत.
पाथर्डी तालुक्यातील एका गावामधील मतिमंद व मूकधिर युवतीच्या पोटात दुखू लागल्याने तिला दवाखान्यात नेण्यात आले. तेथे ती गर्भवती असल्याचे डॉक्टरांनी सांगितले. त्यानंतर 2 मार्च 2022 रोजी युवतीच्या आईने पोलिसात तक्रार दाखल केली होती. या घटनेचा तपास करण्याचे पोलिसांसमोर मोठे आव्हान होते.
पोलिस निरीक्षक सुहास चव्हाण यांच्या मार्गदर्शनाखाली सहायक पोलिस निरीक्षक प्रवीण पाटील, सागर मोहिते यांनी या प्रकरणाचा तपास केला. पीडित मुलीला बोलता येत नव्हते, ऐकू येत नव्हते व ती मतिमंदही होती. पोलिसांनी खूप प्रयत्न केले. मूकबधिर विद्यार्थ्यांचे शिक्षक घेवून तपास केला. सुमारे वीस लोकांच्या रक्ताचे नमुने घेवून नाशिक येथील न्यायसहाय्यक वैज्ञानिक प्रयोगशाळेत तापसणीसाठी पाठविले.
चुलत्याचे नमुने घेतल्यापासून त्याचे वागणे संशयास्पद असल्याचे पोलिसांना जाणवले होते. त्याच्यावर लक्ष ठेवले गेले. अखेर रविवारी नाशिकच्या प्रयोगशाळेचा अहवाल पोलिसांना मिळाला. त्यामध्ये चुलताच मुलीला गर्भवती करणारा असल्याचे उघड झाले. पोलिसांनी त्याला तात्काळ अटक केली. सोमवारी आरोपी चुलत्याला तपासी अधिकारी सहायक पोलिस निरीक्षक प्रवीण पाटील यांनी न्यायाधीश व्ही.आय. शेख यांच्यासमोर हजर केले. शिंदे याला पाच दिवस पोलिस कोठडीत ठेवण्याचे आदेश न्या.शेख यांनी दिले आहेत.
