टाकळीभान : पुढारी वृत्तसेवा : श्रीरामपूर तालूक्यातील टाकळीभान ग्रामपंचयतच्या 10 सदस्यांवर अपात्रतेची कारवाई झालेली असून या सदस्यांना विभागीय आयुक्तांकडून पुढील तारीख 6 जानेवारी 2023 मिळाल्याने या सदस्यांना एक महिनाभर दिलासा मिळाला आहे.
सरकारी जागेत अतिक्रमण केले असल्याच्या मुद्यावरुन ज्येष्ठ शिवसेना नेते राधाकृष्ण वाघुले यांनी जिल्हाधिकारी, अहमदनगर यांच्या न्यायालयात 10 सदस्यांविरोधात दाखल केलेल्या विवाद अर्जाचा जिल्हाधिकारी डॉ. राजेंद्र भोसले यांनी निकाल देत या सर्व सदस्यांचे सदस्यपद रद्द केले आहे. या सर्व सदस्यांनी विभागीय आयुक्त, नाशिक यांच्या कोर्टात धाव घेत जिल्हाधिकारी यांच्या निकालाला आव्हान देत अपिल दाखल केलेले आहे.
विभागीय आयुक्त यांनी जिल्हाधिकारी यांच्या निकालाला एक महिन्याची अंतरीम स्थगीती दिली होती. मात्र 7 ऑक्टोबर नंतर 4 नोव्हेंबर व आज 2 डिसेंबर रोजी सुनावणी ठेवली होती. मात्र आज 6 जानेवारी पुढील तारीख देण्यात आल्याने 'तारीख पे तारीख' सुरु आसल्याची चर्चा सुरू आहे. जिल्हाधिकारी यांच्या निकालाला आव्हान देत या दहा सदस्यांंच्या दोन्ही गटांनी विभागीय आयुक्त यांच्या कोर्टात 2 सप्टेंबर 22 रोजी अपिल अर्ज दाखल केले आहेत.
याबाबत दोन्ही गटांच्या वकिलांकडून तोंडी युक्तिवाद करण्यात येवुन जिल्हाधिकारी यांच्या आदेशाला स्थगिती मागण्यात आली होती. त्यानुसार विभागिय आयुक्तांनी 7 ऑक्टोबर पर्यंत सदस्यांच्या अपात्रतेच्या जिल्हाधिकारी यांच्या आदेशाला स्थगिती देवून 'जैसे थे' परीस्थिती ठेवण्याचे आदेश दिले होते. त्यानंतर 7 ऑक्टोबर रोजी सुनावणी ठेवण्यात आली होती. कामकाज न झाल्याने सुनावणीची पुढील पुन्हा 4 नोव्हेंबर तारीख देण्यात आली होती. त्यानंतर 2 डिसेंबर तारीख होती. मात्र आजही पुढील 6 जानेवारी तारीख देण्यात आली आहे. त्यामुळे या प्रकरणी केवळ 'तारीख पे तारीख' सुरु आसल्याची चर्चा आहे.
