नगर तालुका, पुढारी वृत्तसेवा : गेल्या तीस वर्षांपासून बहुचर्चित साकळाई उपसा सिंचन योजनेच्या सर्वेक्षणाचा कार्यारंभ आदेश निघाला आहे. यासंबंधीचे पत्र खासदार सुजय विखे पाटील, जिल्हा बँकेचे अध्यक्ष शिवाजी कर्डिले, आमदार बबनराव पाचपुते, साकळाई कृती समितीच्या उपस्थितीत उपमुख्यमंत्री देवेंद्र फडणवीस यांनी संबंधित ठेकेदार संस्थेला नगरमध्ये दिले.
शासकीय विश्रामगृह भूमिपूजन, आढावा बैठक, विविध विकास कामांच्या उद्घाटनासाठी उपमुख्यमंत्री देवेंद्र फडणवीस नगरमध्ये आले होते. याप्रसंगी जिल्हाधिकारी कार्यालयात झालेल्या बैठकीदरम्यान साकळाई उपसा सिंचन योजनेच्या सर्वेक्षणाचा कार्यारंभ आदेशाचे पत्र संबंधित ठेकेदार संस्थेला देण्यात आले. साकळाई योजना मार्गी लागण्यासाठी साकळाई कृती समितीने वेळोवेळी आमदार, खासदार व मंत्रालय स्तरावर पाठपुरावा केला होता. तसेच खासदार सुजय विखे पाटील, आमदार बबनराव पाचपुते, जिल्हा बँकेचे अध्यक्ष शिवाजी कर्डिले यांच्या पाठपुराव्याला यश आले. साकळाई उपसा सिंचन योजनेचा लाभक्षेत्रातील शेतकर्यांच्या आशा पल्लवित झाल्या आहेत.
योजनेसाठी खासदार डॉ. विखे प्रयत्नाा करीत होते. सप्टेंबर 2022 मध्ये त्यांनी साकळाई पाणी योजनेच्या सर्वेक्षणास मंजुरी आणली होती. पण पाणी उपलब्ध प्रमाणपत्राची अट असल्यामुळे सर्वेक्षणास सुरुवात होत नव्हती. ती अट वगळून नव्याने साकळाई सर्वेक्षणाचे आदेश राज्य सरकारने काढले होते. तसेच सर्वेक्षणासाठी 2 कोटींचा निधी मंजूर केला होता. त्यामुळे साकळाई पाणी योजनेच्या सर्वेक्षणाचा मार्ग मोकळा झाला. आता प्रत्यक्षात 18 मे 2023 रोजी साकळाईच्या सर्वेक्षणाचा कार्यारंभ आदेश निघाला. एक वर्षात साकळाई योजनेचे सर्वेक्षण पूर्ण करण्याचे आदेश दिले आहेत.
नगर आणि श्रीगोंदा तालुक्यांतील जिरायत भागातील 32 गावांसाठी साकळाई पाणी योजना वरदान ठरणार आहे. 30 वर्षांपासून या योजनेची मागणी होत आहे; फक्त आश्वासनांशिवाय जनतेच्या पदरी काही पडत नव्हते. गेल्या लोकसभा निवडणुकीवेळी डॉ. विखे यांनी या योजनेचा पाठपुरावा सुरू केला. वाळकी (ता.नगर) येथील जाहीर सभेत तत्कालीन मुख्यमंत्री देवेंद्र फडणवीस यांनीही साकळाई योजना पूर्ण केली जाईल, असे आश्वासन दिले होते. 2022 मध्ये भाजप-शिवसेना सरकार सत्तेत आल्यावर खा. डॉ. विखे, आ. बबनराव पाचपुते, माजी आ.कर्डिले यांनी प्रयत्न सुरू केले. साकळाई योजनेचा सर्वेक्षणाचा कार्यारंभ आदेश देतेवेळी संबंधित संस्थेचे ठेकेदार गांगर्डे, जलसंपदा विभागाचे अधिकारी स्वप्निल काळे, कार्यकारी अभियंता बबन वाळके उपस्थीत होते.
