नगर : पुढारी वृत्तसेवा : महापालिकेत आस्थापना खर्चामुळे गेल्या 18 वर्षांपासून रखडलेल्या भरती प्रक्रियेला मुहूर्त सापडला आहे. शासनाने पदभरतीला मान्यता दिल्यानंतर मनपाने टीसीएस कंपनीशी करार केला. आता टीसीएस कंपनीने पदाप्रमाणे अभ्यासक्रम मनपाकडून मागविला आहे. त्यामुळे त्या दोन महिन्यांत भरती प्रक्रिया सुरू होण्याची शक्यता आहे, अशी माहिती सूत्रांकडून मिळाली.
महापालिकेत गेल्या 18 वर्षांपासून पदभरती झाली नाही. त्यामुळे मनपाच्या अनेक विभागांत कर्मचार्यांची रिक्त पदे आहेत. तर, एका अधिकार्याकडे दोन-तीन विभागांचा पदभार आहे.
कर्मचारी व अधिकार्यांची कमी असल्याने महापालिकेच्या कामकाजावर त्याचा परिणाम होत आहे. त्यामुळे अनेक वेळा पदाधिकार्यांनी स्थायी समिती, सार्वसाधारण सभेमध्ये पदभरती करावी अशी मागणी केली. पदभरतीला शासन मान्यता देत नसले तर मानधनावर पदे भरावीत अशी मागणीही पदाधिकार्यांमधून होत होती. दुसरीकडे मनपाचे उत्पन्न व आस्थापना खर्च याचा ताळमेळ बसत नव्हता. आस्थापना खर्च 35 टक्क्यांच्या पुढे जात होता. त्यामुळे शासनाचा नगरविकास विभागाकडून पदभरतीस मान्यता मिळत नव्हती. परिणामी आरोग्य, घनचकरा, उद्यान, विद्युत, अग्निशमन अशा अनेक विभागात गेल्या कित्येक वर्षांपासून बाह्य संस्थेमार्फत कर्मचारी घेऊन कामकाज सुरू आहे.
मनपात 2870 पदे मंजूर असून, सध्या 1600 कर्मचारी
कार्यरत आहेत. सुमारे 1200 कर्मचार्यांच्या जागा रिक्त आहेत. शासनाकडून अवघ्या 135 कर्मचार्यांची भरती करण्यास मान्यता मिळाली आहे. ही भरती प्रक्रियेसाठी टीसीएल कंपनीशी मनपाचा करार झाला आहे. येत्या काही महिन्यांत टीसीएल कंपनी भरती प्रक्रिया राबविणार आहे. टीसीएल कंपनीने महापालिकेकडून पदनिहाय अभ्यासक्रम मागविला आहे. त्यानुसार प्रश्नपत्रिका तयार होणार आहे. त्यामुळे येत्या दोन महिन्यांत भरती प्रक्रिया होण्याची शक्यता आहे. टीसीएल कंपनीच्या हालचाली अंतिम टप्प्यात आहेत, अशी माहिती सूत्रांकडून मिळाली.
भरतीची पदे व संख्या
स्त्री-रोगतज्ज्ञ 1, भूलतज्ज्ञ 1, पर्यावरण संवर्धन अधिकारी 1, कनिष्ठ अभियंता (स्थापत्य) 2, अभियांत्रिकी सहायक 8, आरेखक/आर्किटेक्चरल असिस्टंट 1, संगणक प्रोग्रॅमर 1, विद्युत पर्यवेक्षक 3, पाणी लॅब टेक्निशियन 6, लॅब टेक्निशियन 1, लॅब असिस्टंट 6, प्रदूषण नियंत्रण अधिकारी 1, पशुधन पर्यवेक्षक 1, लघुटंकलेखक 2, कनिष्ठ विधी अधिकारी 2, समाज विकास अधिकारी 1, सॅनिटरी सबइन्स्पेक्टर 12, सब ऑफिसर 1, चालक 20, फायरमन 50, लिपिक टंकलेखक 13
