Samruddhi highway Bus Accident : समृद्धी महामार्गावर अग्नितांडव; बुलढाण्याजवळ बसचा भीषण अपघात; २५ प्रवाशांचा होरपळून मृत्यू | पुढारी

Samruddhi highway Bus Accident : समृद्धी महामार्गावर अग्नितांडव; बुलढाण्याजवळ बसचा भीषण अपघात; २५ प्रवाशांचा होरपळून मृत्यू

By:Amruta Chougule Published on: July 1, 2023, 7:08 AM
buldhana
buldhana

पुढारी ऑनलाईन डेस्क : Samruddhi highway Bus Accident : समृद्धी महामार्गावर अपघाताचे सत्र सुरूच आहे. समृद्धी महामार्गावर बुलढाण्याजवळ पिंपळखुटा येथे विदर्भ ट्रॅव्हल्सच्या बसचा भीषण अपघात घडला आहे. चालकाचे नियंत्रण सुटल्याने बस थेट डिव्हायडरला धडकून उलटली. यानंतर ट्रॅव्हल्स बसने पेट घेतल्यामुळे २६ प्रवाशांचा जागीच होरपळून मृत्यू झाल्याची प्राथामिक माहिती आहे. सिंदखेडराजा परिसरात शुक्रवारी रात्री दोनच्या सुमारास ही घटना घडली.

मिळालेल्या माहितीनुसार, ही बस नागपूरहून पुण्याला जात होती. दरम्यान रात्री दोनच्या सुमारास बसचा भीषण अपघात घडला. आधी ही बस लोखंडी पोलवर आदळली. नंतर डिव्हायडरला बस धडकून उलटली. त्यानंतर बसने पेट घेतला. या बसमध्ये एकूण 33 प्रवासी होते. बसमधील अधिकांश प्रवासी यवतमाळ, वर्धा, नागपूर येथील होते. अपघातानंतर ८ प्रवासी खिडकीच्या काचा फोडून बाहेर आल्याने सुखरूप वाचले. घटनास्थळी पोलिस पथक तातडीने दाखल झाले आहेत. पोलिसांनी 25 प्रवाशांचे मृतदेह बाहेर काढले असल्याची माहिती दिली आहे.

असा घडला अपघात…

संबंधित बातम्या

नागपूरहून निघालेली ही बस बुलढाण्यातील सिंदखेड राजा भागात पिंपळखुंटा येथे 1 वाजून 26 मिनिटांनी हा अपघात घडला. चालकाचे नियंत्रण सुटल्याने बस सुरुवातीला लोखंडी खांबावर आदळली. नंतर डिव्हायडरला धडकली त्यानंतर उलटली. दरम्यान यामुळे बसचा डिझेल टँक फुटला आणि बसने पेट घेतला. आगीने अल्पावधीतच रौद्र रूप धारण केले आणि भीषण अग्नितांडव सुरू झाले. यातील काही प्रवासी काच फोडून बाहेर पडण्यात यशस्वी झाल्याने सुखरूप बचावले. बस चालक, वाहक आणि क्लीनर यांच्यासह ५ प्रवाशांचा यात समावेश आहे.

घटनास्थळी बचावकार्य सुरू असून प्रवाशांचे मृतदेह बाहेर काढण्याचे काम सुरू होते. बसमधील जखमींना तातडीने उपचारासाठी बुलढाणा येथील रुग्णालयात दाखल करण्यात आले आहे. यातील बहुतांश प्रवाशी हे नागपूर, वर्धा आणि यवतमाळचे आहेत.

Tags
By:Amruta Chougule Published on: July 1, 2023, 7:08 AM
Back to top button