नवी दिल्ली/मुंबई : पुढारी वृत्तसेवा
डिझेलची घाऊक खरेदी करणार्या ग्राहकांना तेल कंपन्यांनी दणका दिला असून, घाऊक खरेदीत लिटरमागे 28 रुपयांनी दर वाढविले आहेत. किरकोळ ग्राहकांसाठीचे पेट्रोल पंपावरील दर मात्र 'जैसे थे' आहेत. या दरवाढीचा परिणाम प्रवास भाडेवाढीत तसेच सिमेंट दरवाढीत होण्याची शक्यता आहे.मुंबईत घाऊक डिझेलचे दर 94.14 रुपयांवरून 122 रुपयांवर गेले आहेत. म्हणजेच 28 रुपयांनी दरवाढ झाली आहे. दिल्लीमध्ये घाऊक खरेदीदारांना आतापर्यंत 86.67 रुपये प्रतिलिटर या दराने डिझेलची विक्री केली जात होती; मात्र हा दर 115 रुपयांपर्यंत गेला आहे.
रशिया-युक्रेन युद्धामुळे गेल्या काही दिवसांत इंधन दर कडाडले आहेत. जागतिक बाजारपेठेत क्रूड तेलाचे प्रति बॅरलचे भाव 108 डॉलरवर गेले आहेत. मात्र असे असले तरी तेल कंपन्यांनी मागील नोव्हेंबर महिन्यापासून किरकोळ ग्राहकांसाठीच्या इंधन दरात वाढ केलेली नाही. बल्क खरेदीदारांना तेल कंपन्यांना वेगळ्या पद्धतीने इंधन पुरवठा करते. अशा ग्राहकांसाठीची इंधन साठ्याची व्यवस्थादेखील वेगळी असते.
चढ्या इंधन दरामुळे नायरा एनर्जी, जिओ-बीपी, शेल यांसारख्या खासगी इंधन विक्री कंपन्यांचा तोटा दिवसेंदिवस वाढत चालला आहे. इंधन विकण्यापेक्षा पंप बंद ठेवणे अशा कंपन्यांसाठी जास्त संयुक्तिक बनले आहे. त्यामुळे लवकरच खासगी तेल विक्री कंपन्यांकडून आगामी काळात पंप बंद केले जाण्याची शक्यता आहे.
संरक्षण खाते, रेल्वे आणि वाहतूक महामंडळे, ऊर्जा प्रकल्प, सिमेंट कारखाने, रासायनिक प्रकल्प.