पाडव्यासाठी सराफ बाजार सज्ज; सोने 52 हजार 100, चांदी 59 हजार रू.

कोल्हापूर; पुढारी वृत्तसेवा : पाडव्याच्या मुहूर्तावर सोने-चांदी बाजार सज्ज झाला आहे. गुजरीसह शहर व जिल्ह्यातील सुवर्ण पेढ्यांनी विशेष तयारी केली आहे. पाडव्याच्या पूर्वसंध्येला मंगळवारी सोने दर प्रति 10 ग्रॅम 52 हजार 100 रुपये तर चांदी प्रतिकिलो 59 हजार रुपये होता.

अनेकजण वर्षभर साठविलेली भिशी व बोनस यांची सुरक्षित गुंतवणूक म्हणून सोने-चांदी व दागिने खरेदी करतात. यंदा धनत्रयोदशीला सराफ बाजारात मोठी उलाढाल झाली. सोन्या-चांदीच्या दागिन्यांना मागणी सध्या सोने- चांदीच्या दागिन्यांना मोठी मागणी आहे. त्याचबरोबर देवदेवतांच्या मूर्तींसह इतर दागिन्यांना चांगली मागणी आहे. पाडव्याच्या मुहूर्तावर सोन्याची खरेदी मोठ्या प्रमाणात होण्याची अपेक्षा आहे.