पुढारी ऑनलाईन डेस्क : रोहित पवारांच्या संघर्ष यात्रेला आज पुण्यातून सुरूवात झाली असून युवा संघर्ष यात्रेला युवकांनी मोठी गर्दी केली आहे. शरद पवार आणि रोहित पवार यांचे युवकांकडून जंगी स्वागत करण्यात आलं. यावेळी जेसीबीमधून फुलांची उधळण करण्यात आली. टिळक स्मारकाजवळ ही यात्रा पोहोचली असून पुण्यातील टिळक स्मारक हॉलमध्ये सभेचं आयोजन करण्यात आलं आहे. यावेळी खासदार शरद पवार बोलत होते.
ते म्हणाले, रोहित पवार यांची युवा संघर्ष यात्रा ही युवा पिढीची दिंडी आहे. या संघर्ष यात्रेतून युवा पिढीला प्रोत्सहन मिळेल. तसेच ही आशीर्वाद यात्रा तरुणांसाठी महत्त्वाची असून समाजात जागृती निर्माण करण्याचा मोठा प्रयत्न आहे.युवा संघर्ष यात्रा जर आग्रह करत असेल तर सरकारला निर्णय घ्यायला भाग पाडणार. राज्याच्या मुख्यमंत्र्यांनी या तरुणांच्या मागण्यासाठी बैठक घ्यावी. त्या बैठकीला मी उपस्थित राहून सरकारकडून या मागण्या मान्य करून घेऊ, अन्यथा काय करायचं ते आपण बघू, मात्र सरकार तुमच्या मागण्यांबाबत नक्कीच सकारात्मक विचार करणार अशी अपेक्षाही शरद पवार यांनी व्यक्त केली.
पुण्यातून आज सकाळी ८ वाजण्याच्या सुमारास सुरू झालेली युवा संघर्ष यात्रा सुरु झाली. ११ वाजून ३० मिनिटांनी टिळक स्मारक येथे पदयात्रा पोहोचली. राष्ट्रवादी काँग्रेस पक्षाचे सर्वेसर्वा शरद पवार युवा संघर्ष यात्रेला पाठींबा दर्शविला. 'युवा संघर्ष यात्रेला माझा पाठिंबा आहे! स्वाक्षरी मोहीम' या आशयाच्या फलकावर पवारांनी स्वाक्षरी करून युवा संघर्ष यात्रेला पाठींबा दिला .
पुणे ते नागपूर असा हा आठशे किलोमीटरचा युवा संघर्ष यात्रेचा प्रवास असणार आहे. तब्बल 45 दिवसांचा हा प्रवास असणार आहे. पुण्यातील तुळापूर येथून या यात्रेला सुरुवात झाली असून पुढे काष्टी, कर्जत, पाटोदा, बीड, जातेगाव, पिंपळगाव, कुंभार, परतुर, जिंतूर, सेनगाव, वनोजा, वाशिम, कारंजा, पापळ, पुलगाव, सेवाग्राम, बाजार गाव, नागपूर येथे या युवा संघर्ष यात्रेचा समारोप होणार आहे.