Nashik | जिल्हा ग्रामीण विकास यंत्रणेमार्फत आजपासून गोदा महोत्सव

नाशिक : पुढारी वृत्तसेवा

जिल्हा ग्रामीण ग्रामीण विकास यंत्रणेमार्फत ग्रामीण जीवनोन्नती अभियान अंतर्गत दि. ६ व ७ फेब्रुवारी या कालावधीत डोंगरे वसतिगृह मैदानावर गोदा महोत्सव व विभागीय मिनी सरस महोत्सवाचे आयोजन करण्यात आले आहे. या महोत्सवाचे उद्घाटन मंगळवारी (दि. 6) पालकमंत्री दादा भुसे यांच्या हस्ते करण्यात येणार आहे.

ग्रामीण भागातील महिलांनी उत्पादित केलेल्या वस्तू व खाद्यपदार्थ विक्री विभागीय मिनी सरस प्रदर्शनाचे आयोजन शासनामार्फत केले जाते. यंदाच्या वर्षी विभागीय सरस महोत्सव व गोदा महोत्सव हा नाशिक येथे आयोजित करण्यात आला आहे. विभागीय मिनी सरस व गोदा महोत्सवात नाशिक विभागातील महिला स्वयंसाहाय्यता गटातील महिलांकडून उत्पादित केलेल्या दर्जेदार वस्तूंचे प्रदर्शन व विक्री केली जाणार आहे. त्याचबरोबर जिल्हा ग्रामीण विकास यंत्रणा व उमेद अभियान नाशिकच्या वतीने बचत गटांचा ब्रँड म्हणून ओळखल्या जाणाऱ्या इट वाइजली, तत्त्व या ब्रँडच्या विविध वस्तूंची विक्री या महोत्सवात केली जाणार आहे.

दि. ६ व ७ फेब्रुवारी रोजी आयोजित गोदा महोत्सवांतर्गत दररोज सकाळी १० ते रात्री १० पर्यंत महिलांनी उत्पादित केलेल्या विविध आकर्षक अशा वस्तू व चविष्ट खाद्यपदार्थ नाशिककरांच्या सेवेसाठी उपलब्ध होणार असल्याची माहिती जिल्हा ग्रामीण विकास यंत्रणेच्या प्रकल्प संचालक प्रतिभा संगमनेरे यांनी दिली. बचत गटांकडून उत्पादित केलेल्या दर्जेदार वस्तू व खाद्यपदार्थ योग्य दरात या महोत्सवात नाशिककरांना उपलब्ध होणार आहे. बचतगटांना प्रोत्साहन मिळण्याच्या उद्देशाने नागरिकांनी गोदा महोत्सवाचा लाभ घ्यावा, असे आवाहन जिल्हा परिषदेच्या मुख्य कार्यकारी अधिकारी आशिमा मित्तल यांनी केले आहे.