![युवकाचा खून](http://media.assettype.com/pudhari%2Fimport%2Fwp-content%2Fuploads%2F2023%2F06%2F9-17-3.jpg?w=480&auto=format%2Ccompress&fit=max)
पाचगणी, पुढारी वृत्तसेवा : सर्जापूर (ता. जावली) गावच्या हद्दीत मसनमोर शिवारात रात्री जेवणाच्या पार्टीत दारूच्या नशेत झालेल्या वादावादीत रुईघर (ता. जावली) येथील युवकाचा खून झाल्याची घटना घडली. याप्रकरणी मेढा पोलिसांनी सर्जापूर येथील युवकास अटक केली आहे. किशोर श्याम निकम (वय 29) असे खून झालेल्या युवकाचे नाव आहे. याप्रकरणी वैभव रवींद्र बोराटे (वय 25) याला पोलिसांनी अटक केली आहे.
याबाबत पोलिसांनी सांगितलेल्या माहितीनुसार, मेढा पोलीस ठाण्यात गुरुवार दि. 15 जून रोजी सर्जापूर येथील एका शेतात अनोळखी इसमाचा मृतदेह आढळल्याने त्याबाबतची माहिती पोलिसांना कळवण्यात आली. यावरून अज्ञात मृतदेह म्हणून मेढा पोलीसात याची नोंद करण्यात आली. अनोळखी इसमाची माहिती पोलीस पाटील यांच्या व्हाट्सअप ग्रुपवरुन व्हायरल करण्यात आली. त्या आधारे मृतदेहाची ओळख पटवण्यात आली.
या इसमाचे नाव किशोर श्याम निकम, (रा. रुईघर, ता. जावली) असे समजले. त्यानंतर लागलीच त्याच्या कुटुंबीयांशी संपर्क साधण्यात आला. या इसमाच्या मृतदेहावर काही ठिकाणी मार लागल्याच्या खुणा दिसून आल्या. हा युवक नक्की कशामुळे मयत झाला हे समजत नसल्याने मेढ्याचे सपोनि संतोष तासगावकर व कुडाळ पोलीस चौकीचे ठाणे अंमलदार डी. जी. शिंदे, हवालदार सनी काळे, हवालदार दिगंबर माने यांनी सूत्रे गतिमान केली.
दि. 16 जून रोजी या मयत युवकाच्या नातेवाईकांनी किशोरच्या मृत्यूबाबत संशय व्यक्त केला होता. याबाबत पोलिसांनी तपास केला असता गुरुवारी सर्जापूर गावच्या हद्दीत जेवणाची पार्टी झाल्याची माहिती समोर आली. या पार्टीत दारूच्या नशेत झालेल्या बाचाबाचीचे रूपांतर हाणामारीत झाले. यावेळी वैभव बोराटे याने दांडक्याने किशोर याला मारहाण केल्याचे समोर आले. या मारहाणीत किशोर याचा मृत्यू झाला असल्याचे पोलिसांनी सांगितले. यावरून संशयित आरोपी म्हणून वैभव बोराटे याला पोलिसांनी अटक केली आहे. त्याच्यावर खूनाचा गुन्हा दाखल करण्यात आला आहे. तपास मेढा पोलीस ठाण्याचे सपोनि संतोष तासगावकर करत आहेत.