पुढारी ऑनलाईन डेस्क : मध्य प्रदेश, छत्तीसगड, तेलंगणा आणि राजस्थान विधानसभा निवडणुकीचा आज (दि. ३ डिसेंबर ) निकाल जाहीर होत आहे. दरम्यान, या निवडणुकीच्या निकालावर उद्योगपती आनंद महिंद्रा यांनी एक ट्विट केले आहे. त्यांचे ट्विट सध्या चर्चेत आहे. (Five States Assembly Election 2023)
आनंद महिंद्रा यांनी निवडणूक निकालाचा फोटो शेअर करत, केलेल्या पोस्टमध्ये म्हटले आहे की, "कोणताही खेळ किंवा ब्लॉकबस्टर चित्रपटापेक्षा कृतीशील लोकशाही ही अधिक आकर्षक आणि रोमांचकारक आहे."
विधानसभा निवडणूक निकालाबाबत सर्वसामान्य जनतेसह, उद्योगपती आणि विविध क्षेत्रातील दिग्गज व्यक्तींना देखील या निकालाची किती उत्सुकता आहे हे दिसत आहे. (Five States Assembly Election 2023)
मध्य प्रदेशातील २३० जागांचे निकाल आज रविवारी (दि.२) जाहीर होत आहे. मध्य प्रदेशात पुन्हा एकदा मुख्यमंत्री शिवराज सिंह चौहान यांची जादू दिसून आली आहे. द टाईम्स ऑफ इंडियाच्या वृत्तानुसार, मध्य प्रदेशात भाजपने १५० च्यावर आघाडीवर आहे. तर काँग्रेस ७४ जागांवर आघाडी घेतली आहे. सुरुवातीच्या कलानुसार, मध्य प्रदेशात भाजपला यश मिळत असल्याचे दिसत असल्याने मुख्यमंत्री शिवराज सिंह चौहान यांनी X वर पोस्ट करत 'भारत माता की जय, जनता जनार्दन की जय' असा नारा दिला आहे.
राजस्थानात परंपरा कायम राहणार की, काँग्रेस पुन्हा सत्तेत येणार? याकडे सगळ्यांचंच लक्ष लागलं आहे. निवडणुक आयोग निकालाच्या ट्रेंडनुसार, भाजप ८१ जागांवर, तर काँग्रेस ६० जागांवर आघाडीवर आहे. दरम्यान मुख्यमंत्री अशोक गहलोत यांच्या नेतृत्वाखालील काँग्रेस पिछाडीवर पडताना दिसत आहे. यावरून 'राजस्थानात 'जादुगारा'ची जादू संपली आहे, असा टोला भाजपने काँग्रेसला दिला आहे.
छत्तीसगड विधानसभा निवडणूक मतमोजणीत पहिल्या अडीच तासात क्रिकेट 'टी-20' मधील थरारासारखी आकडेवारी समोर येत आहे, राज्यात विधानसभेच्या ९० जागा आहेत. यापैकी ४५-४५ जागांवर भाजप आणि कॉंग्रेस आघाडीवर आहे. चार राज्य़ांपैकी सर्वाधिक लक्षवेधी मतमोजणी याच राज्याची ठरली आहे, कारण काही मिनिटांमध्येच दोन्ही पक्ष मतमोजणी समांतर वाटचाल करत आहे.
आतापर्यंतच्या निकालानुसार काँग्रेसने बहुमताचा आकडा पार केला आहे. काँग्रेसने ६२ जागांवर आघाडी घेतली असून बीआरएस पिछाडीवर आहे.
