सांगली; पुढारी वृत्तसेवा: महापालिकेच्या स्थायी समिती सभापती निवडणुकीत भाजपचे धीरज सूर्यवंशी विजयी झाले असून, काँग्रेसचे उमेदवार संतोष पाटील यांचा पराभव झाला. या निवडणूकीत सूर्यवंशी यांना 9 मते तर पाटील यांना 5 मते मिळाली. दरम्यान, राष्ट्रवादीचे 2 सदस्य अनुपस्थित राहिले. राष्ट्रवादीला हा मोठा धक्का आहे. दीड वर्षापूर्वीच्या महापौर निवडणुकीतील पराभवाचा वचपा भाजपने काढला असल्याची चर्चा राजकीय वर्तुळात रंगली आहे.
स्थायी समितीत भाजपचे 9, काँग्रेसचे 4, राष्ट्रवादीचे 3 सदस्य आहेत. स्थायी समितीत भाजपचे बहूमत असल्याने इच्छुकांची संख्या वाढली होती. मात्र उमेदवारी मिळवण्यात आणि निवडणुकीतही माजी उपमहापौर व भाजप युवा मोर्चाचे शहर जिल्हाध्यक्ष धीरज सूर्यवंशी यांनी बाजी मारली. सूर्यवंशी यांना 9 मते मिळाली. काँग्रेसचे उमेदवार पाटील यांना 5 मते मिळाली. राष्ट्रवादीच्या पवित्रा केरीपाळे, संगीता हारगे या सदस्या गैरहजर राहिल्या. विजयानंतर भाजपचे कार्यकर्ते, सूर्यवंशी समर्थकांनी प्रचंड जल्लोष केला.
