कोल्हापूर, सागर यादव : केएसए फुटबॉल लीग (Kolhapur Football) स्पर्धेतील प्रॅक्टिस व शिवाजी यांच्यातील सामन्यावेळी झालेल्या हुल्लडबाजी, हाणामारी-दगडफेकीची गांभीर्याने दखल घेत पोलिस प्रशासनाने दोन्ही संघातील खेळाडू व समर्थकांसह सुमारे 70 जणांवर गुन्हे नोंद केले. या कारवाईचे स्वागत खर्या फुटबॉलप्रेमींकडून केले जात आहे. मात्र ही कारवाई यापूर्वीच होणे गरजेचे होते. ती न झाल्यामुळेच हुल्लडबाजी बिनधास्त व प्रचंड प्रमाणात फोफावल्याचे बोलले जात आहे. ज्या-त्यावेळी तत्काळ कारवाईबरोबरच हुल्लडबाजीला खतपाणी घालणार्या सोशल मीडियावरही अंकुश ठेवावा, अशी मागणी होत आहे.
हुल्लडबाजीमुळे निर्माण होणार्या कायदा व सुव्यवस्थेच्या प्रश्नामुळे फुटबॉलवर (Kolhapur Football) बंदीची कारवाई यापूर्वीही प्रशासनाने केली आहे. हुल्लडबाजीमुळे फुटबॉल बंद झाला की राजकारण्यांना गयावया करून व पोलिस प्रशासनाच्या हातापाया पडून तो पुन्हा सुरू करायचा आणि थोडे दिवस गेले की पुन्हा हुल्लडबाजी सुरू असा विचित्र प्रकार कोल्हापूरच्या फुटबॉल क्षेत्रात सुरू आहे. शतकी परंपरा लाभलेल्या फुटबॉल खेळाचे जतन व्हावे, मैदान गाजविणार्या खेळाडूंना त्यांच्या करिअरसाठी लाखो रुपये खर्चून संयोजक विविध स्पर्धांचे आयोजन करतात. मात्र याचा लाभ घेण्याऐवजी नाहक ईर्ष्या, हुल्लडबाजी करून या स्पर्धा उधळून लावण्याचे काम काही खेळाडू व त्यांच्या समर्थकांकडून होताना दिसते. इतकेच नव्हे तर स्पर्धा आयोजकांना पोलिस कारागृहात जावे लागत आहे.
आचारसंहिता कागदोपत्रीच
2019-20 च्या फुटबॉल हंगामात झालेल्या हुल्लडबाजी (Kolhapur Football) व दगडफेकीत पोलिसांसह अनेकजण जखमी झाले होते. दुचाकी व चारचाकी वाहनांची मोडतोड व सार्वजनिक मालमत्तेचेही मोठे नुकसान झाले होते. यामुळे सुमारे दोन महिने फुटबॉल हंगामावर 'केएसए'ने बंदी घातली होती. खेळाडूंच्या करिअरचा विचार करून अध्यक्ष मालोजीराजे यांनी पोलिस प्रशासनाच्या मार्गदर्शक सूचनांनुसार केएसएकडून कडक आचारसंहितेसह फुटबॉल हंगाम सुरू करण्याचा निर्णय घेण्यात आला होता.
अचारसंहितेनुसार मैदानावर डॉल्बी (Kolhapur Football) व फटाके लावणे, गुटखा-मावा-दारू व तत्सम व्यसन करणे, राजकीय नेते, धार्मिक व राष्ट्रपुरुषांचे पुतळे किंवा छायाचित्रे लावणे या गोष्टींवर बंदी घातली होती. हुल्लडबाजीची सर्वस्वी जबाबदारी संयोजकांवर सोपवून प्रत्येक सामन्याचे सीसीटीव्ही फुटेज देणे, प्रत्येक सामन्यांना पोलिस बंदोबस्त असणे, प्रत्येक तालीम -मंडळातील 10 जबाबदार प्रतिनिधींना त्या त्या समर्थकांत बसविणे बंधनकारक करण्यात आले होते. याशिवाय नाहक ईर्ष्या निर्माण होऊ नये यासाठी बक्षिसांच्या रकमेवरही मर्यादा आणली होती. हाय होल्टेज सामने विनाक्षेपक घेण्याचाही निर्णय केएसएकडून घेण्यात आला होता. मात्र केएसएची ही अचारसंहिता कागदोपत्रीच असल्याचे वास्तव आहे.
हुल्लडबाजीला पारावार नाही
मैदानात गुटखा-माव्याच्या पिचकार्यासह कळस म्हणजे मूत्राने भरलेल्या बाटल्या फेकण्याचा गलिच्छ प्रकार बिनधास्त सुरू असतो. सीसीटीव्ही व पोलिसांच्या साक्षीने अश्लील हवभाव व शिव्या देणे, अशा प्रकारची परिसीमा गाठणारी हुल्लडबाजी पाहण्याची वेळ फुटबॉलप्रेमींवर आली आहे. इतकेच नव्हे तर खेळाडूंच्या घरात (Kolhapur Football) जाऊन धमकावण्यासारखे प्रकार सुरू असतात. या प्रकारांना सोशल मीडियासह खेळाडू, संघ व्यवस्थापक, प्रशिक्षक यांच्या कडूनही खतपाणी मिळते. या हुल्लडबाजीमुळे खिलाडूवृत्ती पायदळी तुडविली जाते.
हंगामात वेळोवेळी आचारसंहितेचा भंग
या आचारसंहितेचा वेळोवेळी भंग आजपर्यंत झाला आहे. बक्षिसांच्या रकमेला मर्यादा असताना ईर्ष्येने बक्षिसांचा वर्षाव करण्यात आला. एका-एका गोलसाठी खेळाडूंवर हजारो रुपयांची नाहक उधळण, डॉल्बीचा (Kolhapur Football) दणदणाट सुरूच राहिला. बक्षीस समारंभावेळी मैदानात लाखो रुपये खर्चून इव्हेंट मॅनेजमेंटच्या माध्यमातून स्टेज, आतषबाजी असे प्रकार झाले. यामुळे समर्थकांत नाहक ईर्ष्या वाढली. मैदानात ध्वज, फटाके, पाण्याच्या बाटल्या अशा गोष्टी नेण्यावर बंदी असतानाही पोलिसांच्या उपस्थितीतच या गोष्टींचा गैरवापर मैदानात झाला. इतकेच नव्हे तर एका हुल्लडबाजाकडे चक्क चाकू सापडला होता.
