US air strikes Iran
वॉशिंग्टन: इराणने जॉर्डनमध्ये केलेल्या ड्रोन आणि बॅलेस्टिक क्षेपणास्त्र हल्ल्यात दोन सैनिक ठार झाल्यानंतर अमेरिका संतप्त झाली आहे. अमेरिकेने राष्ट्राध्यक्ष डोनाल्ड ट्रम्प यांच्या आदेशानुसार इराणला बेचिराख करण्यासाठी पुन्हा एकदा मोठी मोहीम सुरू केली आहे. अमेरिकेच्या लष्कराने शनिवारी या कारवाईची अधिकृत घोषणा केली. या ताज्या हल्ल्यांमुळे पश्चिम आशियातील तणाव वाढला असून, मोठ्या युद्धाचा धोका निर्माण झाला आहे.
यूएस आर्मीच्या 'सेंटकॉम'ने जारी केलेल्या अधिकृत निवेदनात म्हटले आहे की, "कमांडर-इन-चीफ यांच्या थेट निर्देशानुसार, अमेरिकन सैन्याने इराणवर नवीन आणि अत्यंत तीव्र हवाई हल्ले सुरू केले आहेत. इराणच्या होर्मुझ सामुद्रधुनीतील व्यावसायिक जहाजांना धोका निर्माण करणाऱ्या लष्करी तळांना आणि त्यांची क्षमता मोडून काढणे हा या हल्ल्यांचा मुख्य उद्देश आहे." याशिवाय, गेल्या रात्री अमेरिकन सैनिकांवर हल्ला करणाऱ्या इराणच्या 'इस्लामिक रिव्होल्यूशनरी गार्ड कॉर्प्स'ला (IRGC) तात्काळ आणि चोख धडा शिकवण्यासाठी ही कारवाई करण्यात आल्याचे अमेरिकेने स्पष्ट केले आहे.
शुक्रवारी (दि. १७) रात्री जॉर्डनमध्ये अमेरिकन लष्करी तळावर झालेल्या बॅलेस्टिक क्षेपणास्त्र आणि ड्रोन हल्ल्यामागे थेट 'आयआरजीसी'चा हात असल्याचा आरोप अमेरिकेने केला आहे. या भीषण हल्ल्यात दोन अमेरिकन सैनिक ठार झाले असून, एक सैनिक अद्याप बेपत्ता आहे. तसेच चार जखमी जवानांना तातडीने रुग्णालयात दाखल करण्यात आले होते, उपचारानंतर त्यांना डिस्चार्ज देण्यात आला आहे. सुरक्षेच्या कारणास्तव मृत जवानांची नावे अद्याप जाहीर करण्यात आलेली नसून, त्यांच्या कुटुंबीयांना सूचित केल्यानंतरच ती समोर आणली जातील, असे सेंटकॉमने स्पष्ट केले.
"ही अत्यंत दुःखद आणि वेदनादायी घटना आहे. आपल्या देशाचे रक्षण करताना आणि सेवा बजावताना या शूर सैनिकांनी बलिदान दिले आहे. त्यांचे हे बलिदान व्यर्थ जाणार नाही."
— डोनाल्ड ट्रम्प, राष्ट्राध्यक्ष, अमेरिका
अमेरिकेचे संरक्षण मंत्री पीट हेगसेथ यांनी सोशल मीडियाद्वारे सैनिकांना श्रद्धांजली वाहताना म्हटले की, "देव या शूर सैनिकांच्या आत्म्यास शांती देवो. त्यांच्या बलिदानामुळे आमचा दहशतवादाविरोधातील संकल्प आणखी मजबूत झाला आहे."
दरम्यान, दोन्ही देशांमध्ये सुरू असलेल्या या थेट लष्करी कारवाईमुळे आंतरराष्ट्रीय स्तरावर चिंतेचे वातावरण आहे. संरक्षण क्षेत्रातील तज्ज्ञांच्या मते, हा संघर्ष असाच सुरू राहिल्यास संपूर्ण पश्चिम आशिया मोठ्या युद्धात होरपळून निघू शकतो. याचा थेट परिणाम जागतिक बाजारपेठेवर होणार असून, कच्च्या तेलाचा पुरवठा खंडित होण्याचा आणि आंतरराष्ट्रीय व्यापाराचे संकट अधिक गडद होण्याचा मोठा धोका निर्माण झाला आहे.
