Cluely dating bonus
सॅन फ्रान्सिस्को : अनेक टेक कंपन्यांमध्ये कर्मचाऱ्यांना पिंग-पॉन्ग टेबल, अमर्याद स्नॅक्स किंवा इतर ठराविक सुविधा मिळतात. पण एका कंपनीने आपल्या कर्मचाऱ्यांसाठी थेट 'डेटिंग'शी संबंधित एक अजब योजना आणली आहे.
सॅन फ्रान्सिस्कोस्थित टेक स्टार्टअप 'क्लूली' (Cluely) चे सीईओ चुंगिन 'रॉय' ली यांनी एक नवीन कंपनी धोरण जाहीर केले आहे, ज्यानुसार जो कर्मचारी आपल्या दुसऱ्या सहकाऱ्यांसाठी ‘डेट’ म्हणजेच जोडीदार शोधून यशस्वीरित्या डेटवर पाठवेल, त्याला तब्बल 500 डॉलर (अंदाजे 42000 रुपये) रोख बोनस दिला जाईल.
सीईओ ली यांनी आपल्या लिंक्डइन पोस्टद्वारे ही घोषणा केली आणि त्यानंतर टेक जगतात आणि सोशल मीडियावर यावर जोरदार चर्चा सुरू झाली आहे. ही केवळ एक गंमत नसून कंपनीच्या अधिकृत 'कल्याणकारी धोरणा'चा (Welfare Policy) भाग असल्याचे त्यांनी स्पष्ट केले आहे.
क्लूलीचे सीईओ चुंगिन 'रॉय' ली यांनी आपल्या लिंक्डइन पोस्टमध्ये या योजनेची सविस्तर माहिती दिली. त्यांनी लिहिले आहे की, "@everyone नवीन कंपनी धोरण: जर कोणताही कर्मचारी दुसऱ्या कर्मचाऱ्यासाठी डेट रेफर करेल (आणि तो कर्मचारी त्या डेटमुळे आनंदी असेल), तर रेफर करणाऱ्या कर्मचाऱ्याला 500 डॉलरचा एकरकमी रोख बोनस मिळेल."
या योजनेची सर्वात खास गोष्ट म्हणजे हा बोनस 'स्टॅकेबल' आहे, म्हणजेच एकापेक्षा जास्त सहकाऱ्यांसाठी डेट शोधल्यास प्रत्येक वेळी बोनस मिळत राहील.
ली यांनी उदाहरणासह स्पष्ट केले- जर बेनने नीलसाठी एक डेट शोधली आणि नील त्यामुळे आनंदी असेल, तर बेनला 500 डॉलर मिळतील. त्यानंतर बेनने ब्रँडनसाठी दुसरी डेट शोधली आणि ब्रँडनही आनंदी असेल, तर बेनला पुन्हा 500 डॉलर मिळतील. म्हणजेच, एकूण 1000 डॉलर!
आपल्या पोस्टच्या शेवटी ली यांनी गंमतीने लिहिले, "जर तुम्हाला क्लूली टीममधील कोणी आकर्षक वाटत असेल, तर कृपया मला थेट मेसेज करा. जोपर्यंत आपल्या सर्वांची सुखाने लग्नं होत नाहीत, तोपर्यंत डेटिंग हे आपल्या कंपनीच्या संस्कृतीचा एक महत्त्वाचा भाग आहे आणि राहील."
या उपक्रमाचं उद्दिष्ट म्हणजे कर्मचार्यांमध्ये जवळीक निर्माण करणं आणि त्यांच्या वैयक्तिक आयुष्यातही आनंददायी बदल घडवून आणणं, असं त्यांनी म्हटलं आहे.
Cluely ही एक अमेरिकास्थित टेक कंपनी आहे जी प्रामुख्याने AI आधारित प्रॉडक्टिव्हिटी टूल्ससाठी ओळखली जाते. इंजिनिअर्ससाठी बनवलेल्या इंटरव्ह्यू ‘चीट’ अॅपमुळे कंपनी चर्चेत आली होती. पारंपरिक नियम झुगारून नवे प्रयोग करणं हे कंपनीचं ब्रीद आहे.
'क्लूली' ही कंपनी आपल्या धाडसी आणि मजेशीर दृष्टिकोनासाठी ओळखली जाते. ही कंपनी 'प्रत्येक गोष्टीत चिटींग करा' (Cheat on everything) या त्यांच्या टॅगलाईनसाठी ओळखली जाते, ज्याचा अर्थ जुन्या सवयी सोडून नवीन आणि सोप्या पद्धतींचा अवलंब करणे असा आहे. कंपनीने एआय-आधारित सॉफ्टवेअर तयार केले आहेत जे ऑफिसमधील कंटाळवाणी कामे सोपी करतात.
मात्र, कंपनी तिच्या उत्पादनांपेक्षा जास्त सीईओ रॉय ली यांच्या बिनधास्त आणि वादग्रस्त सोशल मीडिया पोस्टमुळे चर्चेत असते. त्यांची ही नवीन 'डेटिंग बोनस' योजना कंपनीच्या याच वेगळ्या संस्कृतीचा एक भाग मानली जात आहे.
सोशल मीडियावर संमिश्र प्रतिक्रिया
या घोषणेनंतर लिंक्डइनवर लोकांनी संमिश्र प्रतिक्रिया दिल्या आहेत. एका युझरने गंमतीने म्हटले, "हे फक्त सिलिकॉन व्हॅलीमध्येच घडू शकते."
तर दुसऱ्या एका युझरने चिंता व्यक्त करत विचारले, "याला एचआर विभागाची परवानगी आहे का?" आणि कंपनीच्या एचआर टीमला टॅग केले.
क्लूली कंपनीने जोखीम पत्करणे, चौकटीबाहेरचा विचार करणे आणि कामात मजा आणणे या मूल्यांवर आपली संस्कृती उभी केली आहे.
त्यांची ही नवीन 'रेफर-अ-डेट' योजना याच संस्कृतीला पुढे नेणारी आहे. आता डेटिंगची ही अनोखी योजना ऑफिसमध्ये प्रेमाचे वारे आणेल की एचआर विभागासाठी एक नवीन डोकेदुखी ठरेल, हे पाहणे महत्त्वाचे ठरेल.
एक गोष्ट मात्र नक्की आहे की, क्लूलीच्या या बोनस योजनेने टेक जगतातील सर्वात विचित्र कर्मचारी लाभांपैकी एक म्हणून आपले नाव नोंदवले आहे. कदाचित यशस्वी झाल्यास, क्लूलीचे पुढचे उत्पादन कामाच्या उत्पादकतेवर नव्हे, तर प्रेमावर आधारित असेल.
