पुढारी ऑनलाईन डेस्क : अमेरिकेचे राष्ट्राध्यक्ष डोनाल्ड ट्रम्प (Donald Trump) यांनी भारताच्या उच्च कर धोरणाबद्दल त्यांच्या भूमिका पुन्हा एकदा स्पष्ट केली आहे. तसेच त्यांनी पंतप्रधान नरेंद्र मोदी (Prime Minister Narendra Modi) यांचे कौतुक करत ते एक चांगला मित्र आणि ते एक खूप स्मार्ट व्यक्ती असल्याचे म्हटले आहे. जरी त्यांच्या प्रशासनाने भारतीय उत्पादनांवर परस्पर (रेसिप्रोकल) शुल्क लागू करण्यावर जोर दिला असला तरी दोन्ही देशांदरम्यान सुरू असलेल्या द्विपक्षीय व्यापार चर्चेतून सकारात्मक तोडगा निघेल, असा विश्वास ट्रम्प यांनी व्हाईट हाऊसमध्ये पत्रकारांशी बोलताना व्यक्त केला.
"पीएम मोदी नुकतेच अमेरिका दौऱ्यावर आले होते. आम्ही दोघे खूप चांगले मित्र आहोत. भारत हा जगातील सर्वाधिक कर आकारणाऱ्या देशांपैकी एक आहे. ते खूप स्मार्ट आहेत," असे ट्रम्प म्हणाले. "ते खूप स्मार्ट व्यक्ती आहेत आणि ते माझे खूप चांगले मित्र आहेत. आम्हा दोघांमध्ये खूप चांगची चर्चा झाली. मला आशा वाटते की भारत आणि अमेरिकेच्या द्विपक्षीय चर्चेतून चांगले काहीतरी समोर येईल. तसेच मी असे म्हणू इच्छितो की तुम्हाला एक महान पंतप्रधान मिळाला आहे."
अमेरिका भारतासह इतर देशांवर परस्पर शुल्क लागू करण्याच्या तयारीत आहे. यामुळे व्यापार युद्धाची भीती व्यक्त केली जात आहे. या पार्श्वभूमीवर ट्रम्प यांनी भारताशी मैत्रीच्या संबंधाचा उल्लेख करत पीएम मोदी यांचे कौतुक केले आहे.
ट्रम्प यांनी याआधी अनेकवेळा भारताच्या व्यापार धोरणांबाबत टीका केली आहे. यापूर्वी त्यांनी भारताला 'टॅरिफ किंग' म्हणत त्याचे आयात शुल्क लागू करण्याचे धोरण अत्यंत अयोग्य आणि मजबूत असल्याचा आरोप केला होता.
ते पुढे असेही म्हणाले, "भारताशी आमचे द्विपक्षीय संबंध खूप चांगले आहेत. पण भारताबाबत माझी एकमेव समस्या आहे ती म्हणजे ते सर्वात जास्त कर आकारतात. मला आशा आहे की ते कदाचित कर लक्षणीयरीत्या कमी करण्याचा निर्णय घेतील. पण आम्ही २ एप्रिल रोजी, आम्हाला जो कर आकारला जातो तेवढाच कर आम्ही त्या देशांवर लागू करू."
तुम्ही भारतात काहीही विकू शकत नाही. त्याला काही निर्बंध आहेत. त्यांनी मान्य केले आहे की, त्यांना आता त्यांचे शुल्क कमी करायचे आहे, असा दावा ट्रम्प यांनी केला आहे.
फेब्रुवारीपासून भारताने अमेरिकेसोबत द्विपक्षीय व्यापारी संबंध आणखी मजबूत करण्यावर भर दिला आहे. शुल्क धोरणावरुन सुरु झालेला संघर्ष कमी करण्याचा यामागील उद्देश आहे.
