oman coast attack commercial gfs galaxy ship indians on board missing
पुढारी ऑनलाईन : परराष्ट्र व्यवहार मंत्रालयाने (MEA) ओमानच्या किनाऱ्याजवळील 'GFS गॅलेक्सी' या व्यापारी जहाजावर झालेल्या हल्ल्याचा तीव्र निषेध केला आहे. मंत्रालयाने रविवारी जारी केलेल्या निवेदनात सांगितले की, जहाजावरील ११ भारतीय नागरिकांपैकी १० जणांची सुरक्षित सुटका करण्यात आली असून, एक भारतीय नागरिक अद्याप बेपत्ता आहे.
परराष्ट्र व्यवहार मंत्रालयाच्या माहितीनुसार, ओमानच्या किनाऱ्याजवळ 'GFS गॅलेक्सी' या व्यापारी जहाजावर हल्ला झाल्यानंतर तातडीने बचाव आणि शोधमोहीम सुरू करण्यात आली. जहाजावरील ११ भारतीयांपैकी १० जणांना सुरक्षित बाहेर काढण्यात यश आले आहे, मात्र एका बेपत्ता भारतीय नागरिकाचा शोध अद्याप सुरू आहे.
ओमानमधील भारतीय दूतावास या संपूर्ण परिस्थितीवर बारकाईने लक्ष ठेवून असून, सुरू असलेल्या शोध आणि बचाव मोहिमेत ओमानच्या अधिकाऱ्यांशी सातत्याने समन्वय साधत आहे. या संकटाच्या काळात सहकार्य केल्याबद्दल भारताने ओमानच्या अधिकाऱ्यांचे आभारही मानले आहेत.
परराष्ट्र व्यवहार मंत्रालयाने आपल्या निवेदनात या प्रदेशात व्यापारी जहाजांवर सातत्याने होत असलेल्या हल्ल्यांबाबत तीव्र चिंता आणि दुःख व्यक्त केले आहे. या घटना अत्यंत चिंताजनक असल्याचे नमूद करत भारताने पुन्हा एकदा या भागातील तणाव तातडीने कमी करण्याचे (डी-एस्कलेशन) आवाहन केले आहे.
यासोबतच सुरू असलेल्या राजनैतिक चर्चेद्वारे शांततापूर्ण आणि व्यवहार्य तोडगा काढणे अत्यंत आवश्यक असल्याचे भारताने स्पष्ट केले आहे, जेणेकरून या संपूर्ण प्रदेशात पुन्हा शांतता आणि स्थैर्य प्रस्थापित होईल.
भारताने ठाम भूमिका घेत व्यापारी जहाजे आणि नागरी पायाभूत सुविधांना लक्ष्य करण्याच्या घटना तात्काळ थांबवण्याची मागणी केली आहे. तसेच आंतरराष्ट्रीय कायद्याच्या तत्त्वांनुसार या भागातील सर्व आंतरराष्ट्रीय सागरी मार्गांवरील मुक्त, सुरक्षित आणि अडथळामुक्त नौवहन तसेच व्यापारी हालचाली शक्य तितक्या लवकर पूर्ववत करण्यात याव्यात, जेणेकरून जागतिक व्यापार सुरक्षितपणे सुरू राहील.
