nepal flood china hiding actual information tibetian not allowed to talk about flood
पुढारी ऑनलाईन : नेपाळमधील भीषण पुरात मृतांचा आकडा 600 च्या जवळ पोहोचला आहे. दुसरीकडे, चीनने केवळ 5 जणांचा मृत्यू झाल्याची माहिती जाहीर केली आहे. या भीषण आपत्तीची संपूर्ण माहिती चीनकडून लपवली जात असल्याचा आरोप केला जात आहे.
नेपाळमध्ये बुधवारी झालेल्या भीषण पुरामुळे मृतांची संख्या वाढून 579 वर पोहोचली आहे. या दुर्घटनेत सुमारे दोन हजार लोक बेपत्ता असून त्यांच्याबाबत अद्याप कोणतीही माहिती मिळालेली नाही. भारतातील शेकडो नागरिकांशीही संपर्क होऊ शकलेला नाही.
ही आपत्ती चीनमधूनच सुरू झाली असल्याचे सांगितले जात असताना चीनने आतापर्यंत केवळ पाच जणांचा मृत्यू झाल्याचे म्हटले आहे. चीन आपत्तीपेक्षा तिच्याशी संबंधित माहितीवर अधिक नियंत्रण ठेवत असल्याचा आरोप होत आहे. चीनने मृतांचा अचूक आकडाही अद्याप जाहीर केलेला नाही. नेपाळमध्ये झालेल्या प्रचंड विध्वंसावरून चीनमध्येही मोठ्या प्रमाणात नुकसान झाले असण्याची शक्यता व्यक्त केली जात आहे.
खरी माहिती लपवत असल्याचा चीनवर आरोप
‘द गार्डियन’च्या वृत्तानुसार, चीनमधील माध्यमेही या भीषण आपत्तीबाबत फारशी माहिती देताना दिसत नाहीत. काही पत्रकार प्रत्यक्ष घटनास्थळी गेले तरी तेथील नागरिक किंवा पीडितांशी संवाद साधत नसल्याचे सांगितले जाते.
रिपोर्टर स्वतःची बाजू मांडत चीनच्या मदत आणि बचावकार्याचे कौतुक करत असल्याचे दिसून येते. मात्र, स्थानिक नागरिकांशी संवाद साधून त्यांची परिस्थिती जाणून घेण्याचे टाळले जात आहे. त्यामुळे चीनकडून संपूर्ण माहितीवर नियंत्रण ठेवले जात असल्याचा आरोप होत आहे.
तिबेटी नागरिकांनाही पत्रकारांशी बोलण्यास मनाई?
चीन तिबेटवर आपला दावा करतो. मात्र, तिबेटमधील नागरिकांकडून स्वायत्तता आणि स्वातंत्र्याची मागणी केली जात आहे. तिबेटमध्ये आंतरराष्ट्रीय पत्रकारांना प्रवेश देण्यावरही अनेक निर्बंध आहेत.
तसेच, तिबेटमधील नागरिकांनी पत्रकारांशी संवाद साधल्यास त्यांना शिक्षेला सामोरे जावे लागू शकते, असा दावा केला जातो. तिबेटमधील भाषा आणि संस्कृतीवर चीनकडून होत असलेल्या हस्तक्षेपावर आंतरराष्ट्रीय स्तरावरही टीका करण्यात आली आहे.
मिळालेल्या माहितीनुसार, चीनने मदत आणि बचाव पथक घटनास्थळी रवाना केले आहे. मात्र, ही पथके नेमके काय काम करत आहेत, याबाबत चीनकडून सविस्तर माहिती देण्यात आलेली नाही.
चिनी माध्यमांनी एवढे मात्र सांगितले की, मदत आणि बचावकार्याबाबत राष्ट्राध्यक्ष शी जिनपिंग यांनी उच्चस्तरीय बैठक घेतली होती. तसेच पंतप्रधान ली कियांग यांनी प्रभावित भागाचा दौरा केल्याचेही सांगण्यात आले.
आणखी दोन हिमनद्यांवर अधिकाऱ्यांची नजर
नेपाळच्या हवामान विभागातील अधिकाऱ्यांनी सांगितले की, आता आणखी दोन हिमनद्यांवर लक्ष ठेवण्याचा प्रयत्न केला जात आहे. या दोन्ही हिमनद्या ज्या हिमनदीच्या जवळ आहेत, ती हिमनदी तुटल्यामुळे बुधवारी भीषण पूर आला होता.
‘नॅशनल डिझास्टर रिस्क रिडक्शन अँड मॅनेजमेंट अथॉरिटी’च्या ताज्या माहितीनुसार, मदत आणि बचावकार्यादरम्यान आतापर्यंत सुमारे 4,000 लोकांना सुरक्षित ठिकाणी हलवण्यात आले आहे. मात्र, बेपत्ता लोकांची संख्या सातत्याने वाढत असून ताज्या आकडेवारीनुसार 1,924 लोक अद्याप बेपत्ता आहेत.
शोध आणि बचावकार्याला वेग देण्यासाठी नेपाळ लष्कर, पोलीस आणि सशस्त्र पोलीस दलातील 15,000 हून अधिक जवानांना तैनात करण्यात आले आहे.
बेपत्ता असलेल्या परदेशी नागरिकांच्या संख्येबाबत वेगवेगळी आकडेवारी समोर आली आहे. एका सरकारी अहवालानुसार, बेपत्ता व्यक्तींमध्ये 517 परदेशी नागरिक आणि जलविद्युत प्रकल्पांमध्ये काम करणाऱ्या कर्मचाऱ्यांचा समावेश आहे.
यापूर्वी नेपाळ पोलिसांनी जारी केलेल्या आकडेवारीनुसार, 36 देशांतील 575 परदेशी नागरिक बेपत्ता असल्याचे सांगण्यात आले होते. पोलिसांच्या माहितीनुसार, बेपत्ता परदेशी नागरिकांमध्ये 65 अमेरिकन, 62 युक्रेनियन आणि 33 ब्रिटिश नागरिकांचा समावेश आहे.
याशिवाय, प्रभावित भागातील 149 नेपाळी पर्यटक आणि 1,407 स्थानिक नागरिकही बेपत्ता असल्याचे सांगण्यात आले आहे. प्रशासन आणि सुरक्षा दलांकडून प्रभावित भागात युद्धपातळीवर मदत आणि बचावकार्य सुरू आहे.
