Chatgpt Privacy Legal Risk: आजच्या डिजिटल युगात अनेक लोक वैयक्तिक किंवा कायदेशीर सल्ल्यासाठी AI चॅटबॉट्सचा वापर करत आहेत. पण आता अमेरिकेत वकिलांनी आपल्या क्लायंट्सना स्पष्ट इशारा दिला आहे की, ChatGPT किंवा Claude सारख्या AI टूल्सवर संवेदनशील माहिती शेअर करताना सावध राहा.
न्यूयॉर्कमधील फेडरल न्यायाधीश जेड राकॉफ यांनी दिलेल्या एका महत्त्वाच्या निर्णयानंतर ही चर्चा सुरु झाली आहे. या निर्णयानुसार, AI चॅटबॉट्ससोबत झालेल्या संभाषणांना कोर्टात पुरावा म्हणून वापरलं जाऊ शकतं.
कायदेशीर क्षेत्रात “Attorney-Client Privilege” म्हणजे वकील आणि क्लायंटमध्ये गोपनीय संवाद होतो. पण कोर्टाने स्पष्ट केलं की AI प्लॅटफॉर्म आणि युजर्समध्ये असा कोणताही कायदेशीर गोपनीय संबंध नसतो. म्हणजेच, ChatGPT किंवा Claude वर तुम्ही जे काही लिहिता, ते पूर्णपणे गोपनीय असेलच असं नाही.
GWG होल्डिंग्स कंपनीचे माजी अधिकारी ब्रॅडली हेप्नर यांनी त्यांच्या बचावासाठी Claude AI वापरला होता. पण कोर्टाने त्या AI मधून तयार केलेले दस्तऐवज सादर करण्याचे आदेश दिले. यामुळे स्पष्ट झालं की AI वर केलेले संवाद कोर्टात उघड होऊ शकतात.
अनेक कायदे तज्ज्ञांनी सांगितलं की:
AI ला “विश्वासू सल्लागार” समजू नका
कायदेशीर प्रकरणांबाबत माहिती शेअर करू नका
संवेदनशील डेटा देण्यापूर्वी विचार करा
महत्त्वाचं म्हणजे, सर्व न्यायालयांचा दृष्टिकोन सारखा नाही. काही प्रकरणांमध्ये ChatGPT संवाद वैयक्तिक मानले गेले आहेत. पण एकंदरीत अजूनही या विषयावर स्पष्ट नियम तयार झालेले नाहीत. सध्या तरी तज्ज्ञांचा सल्ला आहे की, कायदेशीर प्रकरणात AI वर अवलंबून राहू नका आणि संवेदनशील माहिती शेअर करण्यापूर्वी वकिलांचा सल्ला घ्या.
