LeT cofounder Amir Hamza critically injured hospitalised in Lahore
इस्लामाबाद/नवी दिल्ली : बंदी घालण्यात आलेली दहशतवादी संघटना लष्कर-ए-तोयबाचा (LeT) सहसंस्थापक आमिर हमजा लाहोरमध्ये राहत्या घराजवळ झालेल्या अपघातात गंभीर जखमी झाल्याचे वृत्त आहे.
हा अपघात आहे की घातपात याबाबत संशय व्यक्त केला जात आहे. सध्या लाहोरमधील रूग्णालयात त्याला दाखल केले असून त्याच्यावर उपचार सुरू आहेत.
दरम्यान, त्याच्यावर गोळीबार झाल्याचीही चर्चा आहे. या घटनेने पाकिस्तानात खळबळ उडाली आहे. पण, पाकिस्तानी अधिकाऱ्यांनी मात्र या घटनेबाबत मौन बाळगले आहे.
या प्रकरणाशी परिचित सूत्रांनी सांगितले की, हमजा हा लष्कर-ए-तोयबाच्या 17 संस्थापक सदस्यांपैकी एक आहे. त्याला त्याच्या घरात झालेल्या अपघातात दुखापत झाली. सोशल मीडियावर काही अहवालांमध्ये हमजाला गोळी लागल्याचा दावा करण्यात आला होता, मात्र चौकशीत या दाव्यांना खोटे ठरवण्यात आले आहे.
आमिर हमजा हा अफगाण मुझाहिद्दीनचे माजी सदस्य असून, लष्कर-ए-तोयबाचे प्रमुख विचारवंत म्हणून त्याची ओळख होती.
तो त्यांच्या आक्रमक भाषणांबद्दल आणि विपुल लेखनासाठी प्रसिद्ध होता. त्याने LeT च्या अधिकृत प्रकाशनाचे संपादन केले होते आणि 2002 मध्ये "काफिला दावत और शहादत" (प्रचार आणि शहिदीचा काफिला) हे पुस्तकही लिहिले आहे.
अमेरिकेच्या ट्रेझरी डिपार्टमेंटने लष्कर-ए-तोयबाला दहशतवादी संघटना म्हणून घोषित केले असून, आमिर हमजाला देखील नामांकित दहशतवाद्यांच्या यादीत समाविष्ट केले आहे.
त्याने लष्कर ए तोयबाच्या केंद्रीय समितीमध्ये काम केले असून, निधी उभारणी, भरती आणि अटक करण्यात आलेल्या दहशतवाद्यांच्या सुटकेसाठी वाटाघाटी यामध्ये महत्त्वाची भूमिका बजावली आहे.
2018 मध्ये, लष्करशी संबंधित जमात-उद-दावा आणि फलाह-ए-इन्सानियत फाऊंडेशन या संस्थांवर पाकिस्तान सरकारने आर्थिक निर्बंध घातल्यानंतर हमजाने LeT पासून स्वतःला दूर केल्याचे सांगितले जाते.
त्यानंतर त्यांनी जैश-ए-मनकफा नावाची वेगळी संघटना स्थापन केली, जी जम्मू आणि काश्मीरमध्ये दहशतवादी कारवाया चालू ठेवण्यासाठी असल्याचा आरोप आहे.
भारतीय प्रसारमाध्यमांच्या माहितीनुसार, जैश-ए-मनकफा ही नवीन संघटना पाकिस्तानमध्ये कार्यरत असून, आमिर हमजा अजूनही LeT च्या नेतृत्वाशी संपर्कात असल्याचे म्हटले जाते.
दरम्यान, या अहवालाच्या वेळेपर्यंत पाकिस्तान सरकारकडून हमजाच्या प्रकृतीबद्दल कोणतेही अधिकृत वक्तव्य देण्यात आलेले नाही.
