Crude Oil Prices
नवी दिल्ली: अमेरिकेचे राष्ट्राध्यक्ष डोनाल्ड ट्रम्प यांनी इराण करार पूर्ण झाल्याचे आणि होर्मुझची सामुद्रधुनी त्वरित व विनाशुल्क पुन्हा खुली करण्याची घोषणा केल्यानंतर, आज (दि. १५) तेलाच्या किमती मार्चनंतरच्या नीचांकी पातळीवर आल्या आहेत. ब्रेंट क्रूडचा भाव ८५ डॉलरच्या खाली आला असून बाजारातील अनिश्चितता कमी झाल्याचे संकेत मिळत आहेत.
आज सकाळच्या व्यवहारात ब्रेंट क्रूड फ्युचर्सची किंमत प्रति बॅरल ३.५८ डॉलर किंवा ४.१ टक्क्यांनी घसरून ८३.७५ डॉलरवर आली. तर अमेरिकेच्या वेस्ट टेक्सास इंटरमिजिएट कच्च्या तेलाचा भाव ४.०१ डॉलर किंवा ४.७२ टक्क्यांनी कमी होऊन ८०.८७ डॉलर प्रति बॅरलवर पोहोचला. याआधी शुक्रवारीही दोन्ही निर्देशांकांमध्ये ३ टक्क्यांहून अधिक घसरण झाली होती.
होर्मुझ सामुद्रधुनीतून तेलपुरवठा पूर्ववत होण्याची अपेक्षा निर्माण झाल्याने बाजारात सकारात्मक वातावरण निर्माण झाले. जागतिक तेल व्यापारासाठी अत्यंत महत्त्वाची मानली जाणारी ही सामुद्रधुनी फेब्रुवारीच्या अखेरीस संघर्ष सुरू झाल्यानंतर प्रभावीपणे बंद होती. इराणमधील एका खासदाराच्या माहितीनुसार, या मार्गातून जाण्यासाठी काही व्यापारी जहाजांना सरासरी २० लाख डॉलर इतका अतिरिक्त खर्च करावा लागत होता.
या जलधुनीतील सततच्या व्यत्ययामुळे तेलाच्या किमती १०० डॉलरच्या वर जाऊ शकतात आणि अमेरिकेतील पेट्रोलच्या किमती विक्रमी पातळीवर पोहोचू शकतात, असा इशारा विश्लेषकांनी दिला होता. रॅपिडन एनर्जीचे अध्यक्ष बॉब मॅकनली यांनी एबीसीच्या 'दिस वीक' या कार्यक्रमात सांगितले की, करार झाला नसता तर इंधनाच्या किमती ५ डॉलर प्रति गॅलनपर्यंत वाढू शकल्या असत्या.
ट्रम्प यांनी 'ट्रुथ सोशल'वर या कराराची घोषणा केली. त्यांनी सांगितले की तेहरानसोबतचा करार अंतिम झाला आहे आणि सागरी वाहतुकीवरील निर्बंध हटवण्यास त्यांनी मंजुरी दिली आहे. "इस्लामिक रिपब्लिक ऑफ इराणसोबतचा करार आता पूर्ण झाला आहे," असे ट्रम्प यांनी लिहिले. "सर्वांचे अभिनंदन! मी याद्वारे होर्मुझची जलधुनी विनाशुल्क खुली करण्यास पूर्ण मंजुरी देत आहे आणि त्याच वेळी, अमेरिकेच्या नौदलाने घातलेली नाकेबंदी त्वरित हटवण्यासही मंजुरी देत आहे," असे ते म्हणाले. ट्रम्प यांनी पुढे म्हटले, "जगातील जहाजांनो, तुमची इंजिने सुरू करा. तेलाचा प्रवाह सुरू होऊ द्या!" ट्रम्प यांनी ही घोषणा व्हाईट हाऊसमध्ये त्यांच्या ८० व्या वाढदिवसानिमित्त आयोजित 'यूएफसी' कार्यक्रमाच्या काही तास आधी केली.
