नवी दिल्ली : अमेरिकेच्या निर्बंधाखालील इराणी कच्चे तेल घेऊन येणाऱ्या ‘पिंग शुन’ या टँकरने प्रवासादरम्यान अचानक आपला मार्ग बदलत भारताऐवजी चीनकडे वळण्याचा निर्णय घेतला आहे. सुरुवातीला गुजरातमधील वडिनार येथे पोहोचण्याचे संकेत देणारे हे जहाज आता चीनमधील डोंगयिंग बंदराकडे जात असल्याचे शिप ट्रॅकिंग कंपनी क्लेप्लरने स्पष्ट केले आहे.
तज्ज्ञांच्या मते, हा बदल मुख्यतः पेमेंटशी संबंधित अटींमुळे झाला असावा. पूर्वी 30 ते 60 दिवसांच्या क्रेडिटवर व्यवहार होत असताना आता विक्रेते तत्काळ किंवा लवकर पैसे देण्याच्या अटी लावत आहेत. त्यामुळे व्यवहारात अनिश्चितता वाढली आहे.
2019 नंतर भारताने इराणकडून कच्चे तेल खरेदी केलेले नाही. अमेरिकेच्या निर्बंधांमुळे हे व्यवहार थांबले होते. अलीकडेच अमेरिकेने 30 दिवसांची सवलत दिल्याने भारत पुन्हा इराणी तेल खरेदी करण्याचा विचार करत होता. मात्र ‘पिंग शुन’च्या मार्गबदलामुळे ही संधी अनिश्चित झाली आहे.
वडिनार येथे दरवर्षी 20 दशलक्ष टन क्षमतेची रिफायनरी असून ती नायरा एनर्जी (रोसनेफ्ट समर्थित) चालवते. पूर्वी भारत इराणकडून मोठ्या प्रमाणात ‘इरण लाइट’ आणि ‘इरण हेवी’ क्रूड आयात करत होता.
