iran israel war ceasefire breaks: पाकिस्तानच्या मध्यस्थीनं जाहीर करण्यात आलेली अमेरिका-इराण-इस्त्रायल शस्त्रसंधीला इस्त्रायलनं २४ तासात वाटाण्याच्या अक्षता लावल्या. डोनाल्ड ट्रम्प यांनी इराणसोबत १५ दिवसाची शस्त्रसंधी जाहीर केली. त्यावेळी इराणने होर्मुझ सामुद्रधुनी व्यापारासाठी खुली करण्यास मान्यत दिली. मात्र इस्त्रायलने लेबनॉनवर पुन्हा हल्ला केल्यानं इराणने पुन्हा होर्मुझ सामुद्रधुनी बंदी केल्याचे एसोसिएट प्रेसने स्थानिक माध्यमांच्या हवाल्याने आपल्या वृत्तात म्हटले आहे.
इराण आणि अमेरिकेने बुधवारी दोन आठवड्यांची शस्त्रसंधी जाहीर केली. या शस्त्रसंधीचा भाग म्हणून इराणने होर्मुझ सामुद्रधुनी पुन्हा ओपन केली होती. यामुळं जागतिक ऊर्जा पुरवठा सुरूळीत होणार होता. मात्र इस्त्रायलच्या मनात काही वेगळंच होतं. इस्त्रायलच्या लष्कराने लेबनॉनवर १० मिनिटात तब्बल १०० क्षेपणास्त्रे दागली.
दरम्यान, इस्त्रायलचे पंतप्रधान बेंजामीन नेतान्याहू यांनी जाहिररित्या अमेरिकेच्या शस्त्रसंधीचे समर्थन केले होते. मात्र इराणने या शस्त्रसंधींच्या अटीत लेबनॉनचा समावेश नाही असं स्पष्ट केलं होतं.
दरम्यान, पाकिस्तानचे पंतप्रधान शाहबाज शरीफ यांनी सगळीकडे शस्त्रसंधी झाल्याचं जाहीर केलं होतं. त्यानंतर नेतान्याहूंनी लेबनॉनबाबत आपली भूमिका स्पष्ट केली होती. त्याला आता क्षेपणास्त्र हल्ला करून कृतीत उतरवली आहे. यामुळं अमेरिका-इराण शस्त्रसंधीवर याचा विपरीत परिणाम होण्याची शक्यता वर्तवली जात आहे.
इस्त्रायलमधून अमेरिकेने या शस्त्रसंधीवेळी आपल्याला विश्वासात घेतलं नाही. अगदी शेवटच्या टप्प्यात शस्त्रसंधीबाबत सांगितल्याचा आरोप केला. तसेच इस्त्रायलने पाकिस्तानची मध्यस्थ म्हणून भूमिका देखील अमान्य केली असून पाकिस्तान विश्वास ठेवण्याच्या पात्रतेचा नाही असं सांगितलं आहे.
