तेहरान; वृत्तसंस्था : इराणने हिंद महासागरातील संयुक्त अमेरिका-ब्रिटनच्या दिएगो गार्सिया लष्करी तळावर दोन मध्यम पल्ल्याच्या बॅलेस्टिक क्षेपणास्त्रांनी हल्ला करण्याचा प्रयत्न केला आहे. मात्र दोन्ही क्षेपणास्त्रे लक्ष्यावर आदळू शकली नाहीत, असे अमेरिकन अधिकार्यांच्या माहितीनुसार वृत्तसंस्थांनी म्हटले आहे.
हल्ल्याचा प्रयत्न, पण अपयश
मिळालेल्या माहितीनुसार, एका क्षेपणास्त्राने उड्डाणादरम्यानच बिघाड झाल्यामुळे मार्गच बदलला. दुसर्या क्षेपणास्त्राला अमेरिकन नौदलाच्या युद्धनौकेने -3 इंटरसेप्टर क्षेपणास्त्राने अडवण्याचा प्रयत्न केला. मात्र ते पूर्णपणे अडवण्यात यश आले का, याबाबत अद्याप स्पष्टता नाही.
इराणच्या क्षेपणास्त्र क्षमतेवर प्रश्नचिन्ह
या हल्ल्यामुळे इराणच्या क्षेपणास्त्रांची क्षमता अपेक्षेपेक्षा अधिक असल्याची शक्यता व्यक्त केली जात आहे. दिएगो गार्सिया हा इराणपासून सुमारे 4,000 किमी अंतरावर आहे. यापूर्वी इराणने आपल्या क्षेपणास्त्रांची मर्यादा 2,000 किमीपर्यंत असल्याचे सांगितले होते. त्यामुळे या घटनेनंतर इराणच्या वास्तविक क्षमतेवर नवे प्रश्न निर्माण झाले आहेत.
अधिकृत प्रतिक्रिया नाही
या घटनेवर अमेरिकेचे व्हाईट हाऊस, वॉशिंग्टनमधील ब्रिटिश दूतावास आणि ब्रिटनच्या संरक्षण मंत्रालयाने अद्याप अधिकृत प्रतिक्रिया दिलेली नाही. त्यामुळे परिस्थितीबाबत अनिश्चितता कायम आहे.
...तर पर्यटनस्थळांवर हल्ले
मध्य पूर्वेत सुरू असलेल्या युद्धाच्या पार्श्वभूमीवर इराणने जगभरातील पर्यटनस्थळांना लक्ष्य करण्याची धमकी देत तणाव आणखी वाढवला आहे. इराणचे लष्करी प्रवक्ते जनरल अबोलफजल शेखार्ची यांनी ‘उद्यान, मनोरंजन स्थळे आणि पर्यटन केंद्रे’ सुरक्षित राहणार नाहीत, असा इशारा दिला.
