Indonesia Waterfall Accident: इंडोनेशियातील एका धबधब्यावर फिरायला गेलेल्या २५ वर्षीय तरुणीचा पाय घसरून मृत्यू झाला आहे. विंडी रहमा पुत्री असे या तरुणीचे नाव असून, ती पश्चिम सुमात्रा प्रांतातील पडांग परिअमन येथील रहिवासी होती. १५ ऑक्टोबर रोजी दुपारी ही घटना घडली. या घटनेचा व्हिडीओ सोशल मीडियावर मोठ्या प्रमाणात व्हायरल होत असून, तो पाहून अनेकांनी हळहळ व्यक्त केली आहे.
मिळालेल्या माहितीनुसार, विंडी रहमा पुत्री इंडोनेशियातील पश्चिम सुमात्रा प्रांतातील लिमापुलुह कोटा जिल्ह्यात असलेल्या रोबो हराऊ धबधब्यावर गेली होती. धबधब्यात अंघोळ करत असताना तिचा पाय घसरला आणि ती उंचावरून खाली पडली. या घटनेनंतर तिचा शोध घेण्यासाठी बचाव पथकाने मोहीम सुरू केली. मात्र, दुसऱ्या दिवशी तिचा मृतदेहच हाती लागला.
गुरुवारी दुपारी सुमारे ३ वाजून ४५ मिनिटांनी ही दुर्घटना घडल्याची माहिती समोर आली. मात्र, बचाव पथकाला या घटनेची माहिती सायंकाळी सुमारे ५ वाजून २७ मिनिटांनी मिळाली. त्यानंतर शोधमोहीम सुरू करण्यात आली.
पदांग येथील शोध आणि बचाव कार्यालयाचे प्रमुख अब्दुल मलिक यांनी दिलेल्या माहितीनुसार, बचाव पथकाने धबधब्याच्या परिसरात शोध घेतला. शुक्रवारी, १६ ऑक्टोबर रोजी सकाळी १० वाजून ४५ मिनिटांनी तरुणीचा मृतदेह सापडला. त्यानंतर पथकाने मृतदेह बाहेर काढून पुढील कार्यवाही केली.
या दुर्घटनेचा व्हिडीओ सोशल मीडियावर मोठ्या प्रमाणात व्हायरल होत आहे. तरुणी धबधब्याजवळ असताना घसरून खाली पडल्याचे या व्हिडीओमध्ये दिसत आहे. या घटनेमुळे सोशल मीडियावर अनेकांनी दुःख व्यक्त केले आहे.
काही युजर्सनी धबधब्याच्या परिसरातील उंच आणि निसरड्या जागांकडे लक्ष का दिले जात नाही. अशा ठिकाणी थोडीशी चूकही जीवावर बेतू शकते, अशी प्रतिक्रिया अनेकांनी दिली. तरुणीच्या मैत्रिणीला हा प्रसंग प्रत्यक्ष पाहावा लागला, याची कल्पनाही करवत नसल्याचे काही जणांनी म्हटले आहे. या घटनेमुळे तरुणीच्या कुटुंबीयांप्रती अनेकांनी सहवेदना व्यक्त केल्या आहेत.
धबधबे आणि निसर्गरम्य ठिकाणी फिरायला जाण्याचा अनेकांना छंद असतो. मात्र, अशा ठिकाणी पाण्याचा प्रवाह, निसरडे दगड आणि उंच कडे यांमुळे अपघात होण्याचा धोका असतो. विशेषतः धबधब्याखाली अंघोळ करताना किंवा फोटो आणि व्हिडीओ काढताना अधिक सावध राहणे गरजेचे आहे.
