तेल अवीव; वृत्तसंस्था : इराण-समर्थित हुथी बंडखोरांनी इस्रायलच्या लष्करी तळावर हल्ला केला. त्याची जबाबदारीही हुथीने स्वीकारली आहे. मध्यपूर्वेतील युद्ध सुरू झाल्यापासून बंडखोरांनी केलेला हा पहिलाच हल्ला आहे.
हुथींचे लष्करी प्रवक्ते, ब्रिगेडियर जनरल याह्या सारी यांनी शनिवारी सकाळी बंडखोरांच्या अल-मसिराह सॅटेलाइट टेलिव्हिजनवर प्रसारित केलेल्या एका निवेदनात हा दावा केला. तथापि, आम्ही हे क्षेपणास्त्र रोखल्याचा दावा इस्रायली लष्कराने केला आहे. शुक्रवारी सारी यांनी एका अस्पष्ट निवेदनातून बंडखोर या युद्धात सामील होतील असे संकेत दिल्यानंतर काही तासांतच हा हल्ला झाला. या युद्धामुळे संपूर्ण प्रदेश हादरला आहे आणि जागतिक अर्थव्यवस्थाही हादरली आहे. सारी म्हणाले की, त्यांनी दक्षिण इस्रायलमधील संवेदनशील इस्रायली लष्करी स्थळे म्हणून वर्णन केलेल्या ठिकाणांना लक्ष्य करून बॅलिस्टिक क्षेपणास्त्रांचा मारा केला.
हुथींच्या युद्धप्रवेशामुळे, बंडखोर पुन्हा एकदा तांबड्या समुद्राच्या कॉरिडॉरमधून प्रवास करणार्या व्यापारी जहाजांना लक्ष्य करतील का, ज्यामुळे जागतिक सागरी वाहतुकीत आणखी व्यत्यय येईल, हा प्रश्नही निर्माण झाला आहे. नोव्हेंबर 2023 ते जानेवारी 2025 या कालावधीत हुथी बंडखोरांनी क्षेपणास्त्रे आणि ड्रोनद्वारे 100 हून अधिक व्यापारी जहाजांवर हल्ला केला होता. यात दोन जहाजे बुडाली आणि चार खलाशांचा मृत्यू झाला.
