Donald Trump Israel Iran ceasefire : इराणसोबत युद्धबंदीची घोषणा केल्यानंतर आणि दोन्ही बाजू कराराच्या अगदी जवळ आल्याचे संकेत दिल्यानंतर, दोन महिन्यांपेक्षा जास्त कालावधी उलटूनही अमेरिकेचे राष्ट्राध्यक्ष डोनाल्ड ट्रम्प यांनी पुन्हा एकदा 'करार अगदी अंतिम टप्प्यात' असल्याचे म्हटले आहे.
सोमवारी उशिरा पत्रकारांशी बोलताना ट्रम्प म्हणाले की, अमेरिका "एका अत्यंत चांगल्या कराराच्या शेवटच्या टप्प्यात" आहे. तसेच पुढील किमान एक आठवडा इस्रायल आणि इराण एकमेकांना त्रास देणार नाहीत, असा अंदाजही त्यांनी नव्याने वर्तविला.
सीएनएनने (CNN) दिलेल्या वृत्तानुसार, युद्धबंदीच्या आधीच्या काळापासून ट्रम्प यांनी सोशल मीडिया पोस्ट, सार्वजनिक कार्यक्रम आणि माध्यमांशी साधलेल्या संवादांद्वारे किमान ३७ वेळा अशी विधाने केली आहेत.इस्रायल आणि इराणमधील करार अगदी जवळ आल्याचे ट्रम्प यांचे दावे संघर्षाच्या सुरुवातीलाच सुरू झाले होते आणि वाढत्या आत्मविश्वासासह ते अनेक महिने सुरू राहिले. जाणून घेवूया ट्रम्प कितीवेळा म्हणाले, 'युद्धबंदीच्या अगदी जवळ'..!
२३ मार्च: युद्ध सुरू होऊन महिनाही झाला नव्हता, तेव्हा ट्रम्प यांनी 'एअर फोर्स वन' विमानप्रवासादरम्यान पत्रकारांना सांगितले की, शांतता चर्चा पुढे सरकत आहे. दोन्ही बाजूंमध्ये "कराराचे मुख्य मुद्दे, किंबहुना जवळपास सर्वच मुद्द्यांवर सहमती झाली आहे," असे त्यांनी नमूद केले होते.
२४ मार्च: त्यांनी आपल्या सार्वजनिक भाषणांमध्ये एकाच मुद्द्याचा वारंवार पुनरुच्चार करण्यास सुरुवात केली की, इराण करार करण्यासाठी अत्यंत उत्सुक आहे. "मला वाटते की आपण हे युद्ध संपवणार आहोत," असे ट्रम्प म्हणाले, पण पुढे त्यांनी "मी तुम्हाला खात्रीने सांगू शकत नाही," असेही जोडले.
२५ मार्च: त्यांनी म्हटले की इराणला "कशाही परिस्थितीत करार करायचा आहे."
२६ मार्च: कॅबिनेटच्या बैठकीत त्यांनी दावा केला की, तेहरान (इराण) "करार करण्यासाठी अक्षरशः विनवण्या करत आहे."
२९ मार्च: 'एअर फोर्स वन'वर पत्रकारांनी विचारले की, त्यांना पुढील आठवड्यात कराराची अपेक्षा आहे का? त्यावर ट्रम्प यांनी उत्तर दिले, "हो, मला इराणमध्ये करार होताना दिसत आहे."
त्यानंतरच्या आठवड्यांत त्यांचे अंदाज अधिक ठाम होत गेले. ६ एप्रिल रोजी ट्रम्प म्हणाले की, एका मोठ्या अडथळ्याचा सामना करण्यापूर्वी दोन्ही बाजू "कराराच्या अगदी जवळ" आल्या होत्या.त्याच्या पुढच्याच दिवशी, म्हणजे ७ एप्रिल रोजी त्यांनी युद्धबंदीची घोषणा केली. चर्चा सुरू असताना ही युद्धबंदी सुरुवातीला दोन आठवडे टिकेल अशी अपेक्षा होती.
१५ एप्रिल: 'फॉक्स न्यूज'शी बोलताना ट्रम्प म्हणाले, "मला वाटते की हे संपत आले आहे, हे अगदी समाप्तीच्या जवळ आहे असे मी पाहतो." ते पुढे म्हणाले, "बघूया काय होते ते. मला वाटते की त्यांना कोणत्याही परिस्थितीत करार करायचा आहे."
१ मे: पुढील काही आठवड्यांत ट्रम्प यांनी हा संघर्ष संपुष्टात येत असल्याचे वारंवार सुचवले. "जेव्हा युद्ध संपेल, ज्याला आता जास्त वेळ लागणार नाही..." असे त्यांनी पत्रकारांना सांगितले.
१८ मे: अशा अंदाजांमध्ये काही काळ खंड पडल्यानंतर ट्रम्प म्हणाले की, मध्यपूर्वेतील देशांच्या विनंतीवरून ते लष्करी हल्ले "दोन किंवा तीन दिवसांसाठी" पुढे ढकलत आहेत, "कारण त्यांना वाटते की ते कराराच्या अगदी जवळ पोहोचत आहेत."
२८ मे: लारा ट्रम्प यांच्याशी घेतलेल्या मुलाखतीत त्यांनी दोन्ही बाजू "एका अत्यंत चांगल्या कराराच्या जवळ" असल्याचे वर्णन केले.
रविवार ७ जून : ट्रम्प यांनी सांगितले की ते "करार करण्याच्या अगदी जवळ" आहेत. मात्र, त्याच वेळी त्यांनी इस्रायल आणि इराणमधील सततच्या चकमकींमुळे या चर्चेला खीळ बसण्याचा धोका असल्याचेही सूचित केले.
मध्यपूर्वेतील परिस्थिती अजूनही तणावपूर्ण असून या भागाला वेगाने बदलणाऱ्या सुरक्षा आव्हानांचा सामना करावा लागत आहे. लेबनॉनमधील इस्रायली लष्करी कारवाईला प्रत्युत्तर म्हणून इराणने इस्रायलवर क्षेपणास्त्र हल्ले केले होते.ट्रम्प यांनी इस्रायलला पुढील लष्करी कारवाई न करण्याचे जाहीर आवाहन केले होते. तरीही इस्रायली दलांनी इराणी पायाभूत सुविधांवर हल्ले केल्याने पुन्हा एकदा तणाव वाढला आहे. ट्रम्प यांनी युद्ध थांबवण्याचे आवाहन केल्यानंतर सोमवारी इस्रायल आणि इराण या दोघांनीही थेट शत्रुत्व तात्पुरते थांबवले. मात्र, परिस्थिती बिघडल्यास लष्करी कारवाई पुन्हा सुरू होऊ शकते, असे संकेत दोन्ही देशांच्या अधिकाऱ्यांनी दिले आहेत.
