वॉशिंग्टन; वृत्तसंस्था : मध्यपूर्वेतील अलीकडील युद्धादरम्यान इराणने गुप्तपणे चिनी गुप्तचर उपग्रह खरेदी केल्याचा धक्कादायक दावा समोर आला आहे. फायनान्शियल टाईम्सच्या वृत्तानुसार, 2024 च्या उत्तरार्धात इराणने ‘टीईई-01बी’ नावाचा उपग्रह मिळवला, ज्यामुळे अमेरिकेच्या लष्करी तळांवर अचूक नजर ठेवणे शक्य झाले.
‘टीईई-01बी’ उपग्रहामुळे इराणला लष्करी लक्ष्य साधणे सोपे झाले
इराणने 2024 मध्ये चिनी ‘टीईई-01 बी’ उपग्रह मिळवल्याचा दावा
उपग्रहाद्वारे अमेरिकन लष्करी तळांचे निरीक्षण केल्याचे आरोप
आयआरजीसी एअरोस्पेस फोर्सकडून उपग्रहाचा वापर
चीनकडून सर्व आरोप फेटाळले
अहवालानुसार, इराणी लष्करी अधिकार्यांनी या उपग्रहाच्या मदतीने अमेरिकेच्या प्रमुख लष्करी ठिकाणांवर लक्ष ठेवले. मार्च महिन्यात ड्रोन आणि क्षेपणास्त्र हल्ल्यांपूर्वी आणि नंतर त्या भागांचे उपग्रह चित्रण करण्यात आले होते. यामध्ये समन्वय निर्देशांक, प्रतिमा आणि कक्षीय विश्लेषणाचा समावेश असल्याचे सांगितले जाते.
या व्यवहाराचा भाग म्हणून इराणला बीजिंगस्थित या कंपनीच्या ग्राऊंड स्टेशन नेटवर्कचा वापरही देण्यात आल्याचा दावा आहे. मात्र, या सर्व आरोपांना चीनच्या परराष्ट्र मंत्रालयाने ठाम नकार दिला आहे. दरम्यान व्हाईट हाऊस, सीआयए आणि पेंटागॉन यांनी यावर तत्काळ प्रतिक्रिया दिलेली नाही. तसेच, अमेरिकन राष्ट्राध्यक्ष डोनाल्ड ट्रम्प यांनी चीनने इराणला मदत केल्यास गंभीर परिणाम भोगावे लागतील, असा इशारा दिला आहे.
हा उपग्रह चीनमधील अर्थ आय को या कंपनीने तयार करून अवकाशात प्रक्षेपित केला होता. त्यानंतर इराणच्या इस्लामिक रिव्होल्युशनरी गार्ड कॉर्प्स (आयआरजीसी) च्या एअरोस्पेस फोर्सने त्याचा ताबा घेतल्याचे सांगितले जाते. लीक झालेल्या लष्करी कागदपत्रांच्या आधारे हा दावा करण्यात आला आहे.
