कोल्हापूर; पुढारी वृत्तसेवा : दिवाळी सणाच्या तोंडावर गोकुळने म्हैस दुधाच्या विक्री दरात प्रतिलिटर 3 रुपये तर खरेदी दरात 2 रुपयांनी वाढ करण्याचा निर्णय सोमवारी संचालक मंडळाच्या बैठकीत घेण्यात आला. गायीच्या दुधाच्या खरेदी दरात 3 रुपयांनी वाढ करण्यात येणार आहे. गायीच्या दूध विक्री दरात मात्र कोणतीही वाढ करण्यात येणार नाही, अशी माहिती गोकुळचे अध्यक्ष विश्वास पाटील यांनी पत्रकारांना दिली. (Gokul Milk Rate Hikes)
गोकुळमध्ये सत्ता बदल झाल्यानंतर गेल्या सव्वा वर्षात दूध खरेदी व विक्री दरात आतापर्यंत सहा वेळा वाढ करण्यात आली आहे. खरेदी दरात वाढ केल्यामुळे दूध उत्पादक शेतकर्यांची दिवाळी गोड होणार आहे. याची अंमलबजावणी 21 ऑक्टोबरपासून करण्यात येणार आहे. (Gokul Milk Rate Hikes)
जागतिक पातळीवर दूध पावडरची मागणी आणि किमती वाढल्यामुळे गोकुळने दूध खरेदी दरामध्ये वाढ करण्याचा निर्णय घेतला. सध्या गोकुळचे जिल्ह्यातील दूध संकलन 13 लाख 15 हजार 410 लिटर आहे. विक्री 15 लाखापेक्षा अधिक आहे. त्यामुळे कमी पडणारे दूध बाहेरून खरेदी करावे लागत आहे. (Gokul Milk Rate Hikes)
दूध खरेदी दरात वाढ करून गोकुळने दूध उत्पादक शेतकर्यांना दिवाळीची भेट दिली आहे. गायीच्या दूध खरेदी दरात 3 रुपयांनी वाढ करण्यात आली आहे, मात्र विक्री दरात कोणतीही वाढ करण्यात येणार नसल्याचे पाटील यांनी सांगितले. (Gokul Milk Rate Hikes)
म्हैस दूध खरेदी दर 6.0 फॅट व 9.0 एसएनएफ प्रतिलिटर 45 रुपये 50 पैसे होता. तो आता 47 रुपये 50 करण्यात आला आहे. गाय दूध खरेदी दर 3.5 फॅट व 8.5 एसएनएफ प्रतिलिटर 32 रुपये होता, तो आता 35 रुपये राहील.
11 हजार टन दूध पावडरला मागणी
युक्रेनमधील युद्ध परिस्थितीमुळे दूध पावडरला मागणी मोठ्या प्रमाणात वाढली आहे. गोकुळकडे 11 हजार टन दूध पावडरची मागणी आहे. परंतु गोकुळ ही मागणी पूर्ण करू शकत नाही, असे पाटील यांनी सांगितले.
विक्री दर
म्हैस दूध – सध्याचा दर : सुधारित दर
एक लिटर (कोल्हापूर ) : 60 रुपये : 63 रुपये
500 मि.लि. : 30 रुपये : 32 रुपये
एक लिटर (मुंबई, पुणे) : 66 रुपये : 69 रुपये
500 मि.लि. : 33 रुपये : 35 रुपये
