म्हापसा : पुढारी वृत्तसेवा
कुचेली, बार्देश येथील एका बारमध्ये झालेल्या किरकोळ वादाचे रूपांतर हाणामारीत होऊन ६३ वर्षीय सुभाष नाईक यांची निघृण हत्या करण्यात आली. या खळबळजनक प्रकरणी म्हापसा पोलिसांनी तत्परतेने कारवाई करत दोन संशयितांना अटक केली. दोघेही सध्या पोलिस कोठडीत आहेत. रविवारी फॉरेन्सिक पथकाच्या उपस्थितीत म्हापसा पोलिसांनी घटनास्थळी तपास काम पूर्ण केले.
सुभाष नाईक कुचेली येथील संशयित अॅरॉन फर्नाडिस याच्या बारमध्ये गेले होते. तिथे उपस्थित असलेल्या संशयितांशी त्यांचा किरकोळ कारणावरून वाद झाला. वादाचे पर्यावसान अमानुष मारहाणीत झाले. संशयितांनी नाईक यांना लाथाबुक्क्यांनी आणि हाताने गंभीर मारहाण केली होती, असे पोलिस तपासात समोर आले आहे. नाईक हे अधून-मधून या बारमध्ये जायचे. कालांतराने नाईक यांना बरे वाटत नसल्याने, कुटुंबीयांनी त्यांना जिल्हा रुग्णालयात दाखल केले. दुर्दैवाने उपचारादरम्यान त्यांचा मृत्यू झाला होता.
सुरुवातीला हा नैसर्गिक मृत्यू असावा असा अंदाज वर्तवण्यात येत होता. मात्र स्थानिक ग्रामस्थांनी नाईक यांना बारमध्ये मारहाण झाल्याचा संशय व्यक्त केला. ग्रामस्थांच्या पाठिंब्यानंतर कुटुंबीयांनी पोलिसांत तक्रार दिली.
शवविच्छेदन अहवालात नाईक यांच्या बरगड्या, कणा मोडल्याचे आणि डोक्याच्या कवटीला गंभीर दुखापत झाल्याचे समोर आले. या अंतर्गत जखमांमुळेच त्यांचा मृत्यू झाल्याचे वैद्यकीय अहवालात स्पष्ट झाले.
म्हापसा पोलिसांनी या प्रकरणी दोघांना अटक केली आहे. ज्यात अॅरॉन फर्नाडिस (वय २२, रा. कुचेली) व रामप्रसाद गुईन (वय ४३, रा. कुचेली) यांचा समावेश आहे. रामप्रसाद या बारमध्ये कूक म्हणून कामाला होता. पोलिसांनी या दोघांवर भारतीय न्याय संहिता कलम १०३ (१) आणि ३(५) अंतर्गत खुनाचा गुन्हा दाखल केला असून त्या दृष्टिकोनातून म्हापसा पोलिस तपास करीत आहेत.
