सासष्टी : पुढारी वृत्तसेवा
कुळे पोलिसांनी दाखल केलेल्या २०२० मधील मारहाण आणि अनधिकृत प्रवेशाच्या खटल्यातून, सांगे येथील अतिरिक्त संयुक्त प्रथम श्रेणी न्यायदंडाधिकारी न्यायालयाने प्रवीण म्हार्दोळकर उर्फ घाडी, मितेश नाईक, प्रज्योत नाईक आणि साईराज नाईक यांची निर्दोष मुक्तता केली आहे.
१ मे २०२० रोजी आरोपींनी आणि इतरांनी बेकायदेशीर जमाव जमवून तक्रारदाराच्या घरात घुसखोरी केली, तसेच तक्रारदार व एका मजुराला शिवीगाळ करून मारहाण केली, असा आरोप सरकारी पक्षाने केला होता. मात्र, सरकारी पक्ष हे आरोप संशयापलीकडे सिद्ध करण्यात अपयशी ठरला, असे न्यायालयाने नमूद केले.
साक्षीदारांचे जबाब एकमेकांशी विसंगत होते आणि वैद्यकीय पुराव्यांनीही आरोपांना दुजोरा दिला नाही; एका पीडित व्यक्तीच्या अंगावर कोणतीही दुखापत आढळली नाही आणि तक्रारदाराच्या बाबतीतही दुखापत झाल्याचे सिद्ध झाले नाही, असे न्यायालयाने निरीक्षण नोंदवले. नंतर न्यायालयाने सर्व चारही आरोपींची सर्व आरोपांतून निर्दोष मुक्तता केली.
