मडुरा : शेतात धुमाकूळ घालणाऱ्या 'ओंकार' हत्तीचे संकट आता थेट घरापर्यंत पोहोचले आहे. बुधवारी रात्री ७.१५ वा. च्या सुमारास ओंकार हत्ती चक्क मडुरा येथील बाबू शिरोडकर यांच्या घराच्या अंगणात घुसला आणि त्याने घरात घुसण्याचा प्रयत्न केला. अचानक अंगणात हत्ती आल्याने घरातील सदस्यांची एकच तारांबळ उडाली.
काहीवेळ घरात भीतीचे वातावरण पसरले होते. आरडाओरड झाल्यानंतर ग्रामस्थांनी तात्काळ वनविभागाला माहिती दिली. वनविभागाचे कर्मचारी वेळीच घटनास्थळी दाखल झाल्याने हत्तीला पुन्हा जंगलाच्या दिशेने पिटाळून लावण्यात यश आले.
'ओंकार' वर मशाल फेक प्रकरणी कडक कारवाई : जिल्हा उपवनसंरक्षक मिलिश शर्मा
सावंतवाडी तालुक्यातील कास गावामध्ये शांतपणे स्वच्छंद विहार करणाऱ्या 'ओंकार' हत्तीवर चक्क पेटत्या मशाली फेकण्याचा अमानुष प्रकार नुकताच उघडकीस आला. या घटनेमुळे सर्वसामान्य नागरिकांसह वन्यजीव प्रेमींमध्ये प्रचंड संतापाची लाट उसळली असून संबंधितांवर तातडीने कठोर कारवाई करण्याची मागणी जोर धरू लागली आहे.
या गंभीर प्रकरणाची तत्काळ दखल घेत वनविभागाकडून सखोल चौकशी सुरू करण्यात आली आहे. घटनेच्या वेळी त्या ठिकाणी कर्तव्यावर असलेल्या ३ वनरक्षक आणि ४ हाकारे अशा एकूण ७ जणांना वन विभागाने कारणे दाखवा नोटिसा बजावल्या आहेत.
